ඉන්දියාවේ පූනේ නුවර ප්‍රමුඛ පෙළේ දේපළ වෙළඳාම් ව්‍යාපාරිකයෙකු වන කේතන් අගර්වාල්ගේ අබිරහස් මරණය සම්බන්ධයෙන් අත්අඩංගුවට ගෙන සිටින ඔහුගේ පෙම්වතිය වන සියා ගෝයල් පිළිබඳව ඇයගේ මව්පියන් දැඩි ප්‍රකාශයක් සිදුකර තිබේ.
මාධ්‍ය අමතමින් සියාගේ මව වන පූජා ගෝයල් සහ පියා වන ප්‍රවීන් ගෝයල් ප්‍රකාශ කර ඇත්තේ, මෙම සාහසික අපරාධයට තම දියණිය සම්බන්ධ බව නීතිය ඉදිරියේ ඔප්පු වුවහොත් ඇයට උපරිම දඬුවම් ලබා දිය යුතු බවය.
"මගේ දියණිය මෙවැනි අපරාධයක් කළා කියලා තවමත් මට හිතාගන්න බෑ. නමුත් මේ සිදුවීමේදී කවුරුන් හෝ වැරදිකරුවෙකු වුවහොත්, ඒ මගේ දියණිය වුවත්, ඇයට දිය හැකි දරුණුතම දඬුවම දිය යුතුයි. අපේ කේතන්ව ඇද දමා ඝාතනය කළ ඒ ලොහගාඩ් බලකොටුවෙන්ම ඇයවත් පහළට ඇද දැමිය යුතුයි" යනුවෙන් සියාගේ මව්පියන් දැඩි සංවේගයෙන් හා කෝපයෙන් යුතුව පවසා ඇත.
පොලිස් පරීක්ෂණවලට අනුව, 26 හැවිරිදි වියේ පසු වූ කේතන් අගර්වාල් සමඟ විවාහ වීමට සියා ගෝයල් අකමැත්තෙන් පසුවී ඇත.
මේ හේතුවෙන් ඇය සිය මිතුරෙකු වන චේතන් චෞද්‍රි සමඟ එක්ව කේතන්ව ඝාතනය කිරීමට සූක්ෂ්ම සැලසුමක් සකස් කර ඇති බවට පොලිසිය සැක පල කරයි.
පසුගිය මැයි 31වැනිදා ලොහගාඩ් බලකොටුව නැරඹීමට ගිය අවස්ථාවේදී කේතන්ව ප්‍රපාතයට තල්ලු කර දැමීමට ඇය ප්‍රථමයෙන් උත්සාහ කර ඇති අතර, පසුව ජූනි 14 වැනිදා ද තවත් අසාර්ථක ඝාතන තැත් කිරීමක් සිදු කර ඇති බව විමර්ශනවලදී හෙළි වී තිබේ.
කෙසේවෙතත් කේතන්ගේ පවුලේ ඥාතීන් පවසන්නේ නීතිගරුක, උගත් තරුණයෙකු වූ කේතන්ට අත්වූ මෙම ඉරණම සම්බන්ධයෙන් තමන් දැඩි සේ කම්පාවට පත්ව සිටින බවත්, සාධාරණ පරීක්ෂණයක් මඟින් යුක්තිය ඉටුවනු ඇතැයි විශ්වාස කරන බවත්ය.
දැනට පොලිස් අත්අඩංගුවේ පසුවන සියා ගෝයල් සහ ඇයගේ සගයා වන චේතන් චෞද්‍රි යන දෙදෙනා ලබන ජූනි 29 වැනිදා දක්වා තවදුරටත් රක්ෂිත බන්ධනාගාරගත කිරීමට අධිකරණය නියෝග කර ඇත.
පූනේ ග්‍රාමීය පොලිසිය සිද්ධිය සම්බන්ධයෙන් වැඩිදුර විමර්ශන සිදු කරයි.
