අභිනවයෙන් ඉදි කරන ලද “අධිකරණ පියස 1” සහ මහජන චින සමුහාණ්ඩුවේ පුර්ණ ප්රදානයක් වන නවීකරණය කරන ලද අභියාචනාධිකරණ ගොඩනැගිල්ල අද (18) පෙරවරුවේ ජනතා අයිතියට පත් කරන ලදි.
ඒ අග්රාමාත්ය හරිනි අමරසූරියගේ ප්රධානත්වයෙනි.
මේ සඳහා අගවිනිසුරු ජනාධිපති නීතීඥ මුර්දු ප්රනාන්දු, අධිකරණ හා ජාතික ඒකාබද්ධතා අමාත්ය නීතීඥ හර්ෂණ නානායක්කාර හා ශ්රී ලංකාවේ චීන තානාපති QI Zhenhong යන ආරාධිතයින් රැසක් ද එක්ව සිටියහ.
චීනය හා ශ්රී ලංකාව අතර පවතින රාජ්ය තාන්ත්රික සබඳතාවය ශක්තිමත් කරමින් අලුත්කඩේ උපරිමාධිකරණ සංකීර්ණය 1988 වසරේදී පරිත්යාගයක් ලෙස චින රජය විසින් ශ්රී ලංකාවට ලබාදී තිබේ.
උපරිමාධිකරණ සංකීර්ණය පුළුල් ලෙස නවීකරණය කිරීමට සහ අදාළ තාක්ෂණික හා මුල්ය පහසුකම් ලබා දීමට මහජන චීන සමුහාණ්ඩුව, ශ්රි ලංකා රජය සමඟ 2016 වසරේ දී එකඟ විය.
එකී නවීකරණ කටයුතුවලට අදාළව ගිවිසුම් අත්සන් කිරීම 2021 දෙසැම්බර් 21 වන දින මහජන චීන සමුහාණ්ඩුවේ වාණිජ අමාත්යාංශය, මෙරට අධිකරණ අමාත්යාංශය හා චින ජාත්යන්තර සහයෝගිතා නියෝජිතායතනය අතර සිදු විය.
එම ගිවිසුමට අනුව යුවාන් මිලියන 240 ක චින රජයේ මුල්ය ප්රතිපාදන යටතේ උපරිමාධිකරණ සංකීර්ණයේ නවීකරණ කටයුතු 2023 අප්රේල් මස 23 වන දින ආරම්භ විය.
එහි ඇස්තමේන්තු සකස් කිරීමේදී ව්යාපෘතිය සඳහා වැය වන මුදල යුවාන් මිලියන 229 ක් වු හෙයින් පරිපූර්ණ ඇස්තමේන්තු මුල්ය ගිවිසුමකට යළිත් අත්සන් තබන ලදී.
උපරිමාධිකරණ සංකීර්ණයෙහි මුලික පෙනුම ආරක්ෂා කරමින් ව්යුහය වෙනස් නොවන පරිදි නවීකරණ කටයුතු සිදු කිරීම මෙහි අභිලාෂය වේ.
මෙම ව්යාපෘතියේ පළමු පියවරේදී නව පහසුකම්වලින් සමන්විත සත් පුද්ගල, පංච පුද්ගල, ත්රි පුද්ගල විනිශ්චයාසන සහිත නව අභියාචනාධිකරණ විනිශ්චය ශාලා 11 ක්, විනිසුරුවරුන් සඳහා නිල කාමර 20 ක්, කාර්ය මණ්ඩල කාර්යාල පහසුකම්, ස්වයංක්රිය කැමරා පද්ධතියකින් යුත් නවීන පාලක මැදිරියක්, විනිසුරුවරුන් වෙනුවෙන් වාහන අංගනයක්, නවීන උපාංග සහිත ආපන ශාලාවක්, විදුලි සෝපාන හා නඩු වාර්තා කාමර තුනකින් සමන්විතව අභියාචනාධිකරණ ස්ථාපිත කිරීම සඳහා ගොඩනැගිල්ල නවීකරණය කර තිබේ.
අධිකරණ පියස ව්යාපෘතිය යටතේ ඉදි කිරීම් ආරම්භ කළ පළමු උප ව්යාපෘතිය වන “අධිකරණ පියස -1” ද මෙයට සමගාමීව ජනතා අයිතියට පත් කෙරිණි.
එහි දෙවන ව්යාපෘතිය ලෙසින් දිසා හා මහාධිකරණ සංකීර්ණයත්, තෙවන ව්යාපෘතිය ලෙස අධිකරණ අමාත්යාංශ සංකීර්ණය හා සිව්වන ව්යාපෘතිය ලෙස නිල නිවාස සංකීර්ණයද ඉදි කිරීමට නියමිතය.
අලුත්කඩේ පිහිටි බීසීසී සමාගමට අයත් අක්කර හයක භූමි ප්රමාණයක් අධිකරණ අමාත්යාංශය වෙත පවරා ගනිමින් අධිකරණ පියස ව්යාපෘතිය 2021 ජනවාරි මස 21 වන දින ආරම්භ කළ අතර, ව්යාපෘතියේ ඉදි කිරීම් කොන්ත්රාත්කරු සහ උපදේශක ආයතනය ලෙස ඉංජිනේරුමය කාර්යයන් පිළිබද මධ්යම උපදේශක කාර්යාංශය කටයුතු කරනු ඇත.
