හලාවත – කොළඹ ප්‍රධාන මාර්ගයේ වට්ටක්කල්ලිය ප්‍රදේශයේදී මෝටර් රථයක් තවත් වාහන දෙකක ගැටී මාර්ගය අසල සිටි කාන්තාවක් සහ දරුවෙකු යට කර බිහිසුණු අනතුරක් සිදුව තිබේ.
අද (19) පස්වරු 4.30ට පමණ මෙම අනතුර සිදුව ඇති අතර, හලාවත ප්‍රදේශයේ පැවති අවමංගල්‍ය උත්සවයකට සහභාගී වී නැවත මුන්දලම, බරලන්කට්ටුව ප්‍රදේශයේ පිහිටි සිය නිවස බලා යමින් සිටි රියදුරෙකු පැදවූ මෝටර් රථයක් මෙලෙස අනතුරට ලක්ව ඇති බව වාර්තා වේ.
එම මෝටර් රථය මාර්ගයේ ගමන් කරමින් තිබූ තවත් මෝටර් රථයක ගැටී ඇති අතර, එම ගැටීමෙන් පසු මෝටර් රථය ටිපර් රථයක ද ගැටී තිබුණි.
අනතුරුව මෝටර් රථය මාර්ගයෙන් ඉවතට පැන මවක් සහ දරුවෙකු යට කර හලාවත නගර නාම පුවරුවේ ද ගැටී නැවතී තිබේ.
අනතුරට සම්බන්ධ මෝටර් රථයේ රියදුරු වෛද්‍ය පරීක්ෂණයකට යොමු කර ඇති අතර, එහිදී ඔහු මත්පැන් පානය කර සිටි බවට වාර්තා වේ.
වාහනයේ තිබී මත්පැන් බෝතල් ඇතුළු මත්පැන් පානය කිරීම සඳහා යොදා ගන්නා ලද කෝප්ප සහ අනෙකුත් බීම වර්ගද පොලීසිය විසින් සොයා ගෙන ඇත.
මෝටර් රථය සහ එහි රියදුරු හලාවත පොලීසියේ රථවාහන අංශයේ නිලධාරීන් විසින් අත්අඩංගුවට ගෙන තිබේ.
අනතුරින් තුවාල ලැබූ මව සහ දරුවා හලාවත මහ රෝහලට ඇතුළත් කර ඇත.
හලාවත පොලීසියේ රථ වාහන අංශයේ ස්ථානාධිපති පොලිස් පරීක්ෂක අමිල් චන්දන මහතා ප්‍රධාන පොලිස් නිලධාරීන් කණ්ඩායමක් වැඩිදුර පරීක්ෂණ සිදුකරයි.
