මඩකලපුව නගරයේ වසා තිබූ නිවසක් බිඳ රුපියල් ලක්ෂ 30කට ආසන්න වටිනාකමකින් යුත් රන් භාණ්ඩ සොරකම් කළ සැකකරුවෙකු මඩකලපුව මූලස්ථාන පොලිසිය විසින් අත්අඩංගුවට ගෙන තිබේ.
මෙලෙස අත්අඩංගුවට ගෙන ඇත්තේ 56 හැවිරිදි පුද්ගලයෙකු වන අතර, ඔහු පවුම් 8කට ආසන්න රන් භාණ්ඩ මෙලෙස සොරකම්කර ඇත.
මඩකලපුව සෙබැස්තියර් වීදියේ පිහිටි නිවසක හිමිකරුවන් පසුගිය 14 වැනිදා නිවස වසා පිටතට ගොස් සිටි අවස්ථාවේ මෙම සොරකම සිදුකර තිබේ.
ඒ සම්බන්ධයෙන් පොලිසියට ලැබුණු පැමිණිල්ලකට අනුව, මඩකලපුව මූලස්ථාන පොලිස් ස්ථානයේ අපරාධ විමර්ශන අංශයේ ස්ථානාධිපති, පොලිස් පරීක්ෂක වයි. විජේරාජා මහතාගේ ප්‍රධානත්වයෙන් යුත් කණ්ඩායමක් විමර්ශන ආරම්භ කළහ.
නිවසේ තිබූ CCTV කැමරාවක සටහන්ව තිබූ දර්ශන පදනම් කරගනිමින් පරීක්ෂණ මෙහෙය වූ පොලිසිය, ඌරණි ප්‍රදේශයේ පදිංචි මෙම සැකකරු අත්අඩංගුවට ගෙන ඇත.
අත්අඩංගුවට ගත් සැකකරුගෙන් කරන ලද ප්‍රශ්න කිරීම්වලදී, කාත්තන්කුඩි ප්‍රදේශයේ ස්වර්ණාභරණ අලෙවිසැලකට විකුණන ලද මුදුව, පෙන්ඩනය සහ කරාබු ඇතුළු ආභරණ මෙන්ම, සඟවා තිබූ සෙසු රන් භාණ්ඩ ද පොලිසිය විසින් සොයාගෙන තිබේ.
මෙම සිද්ධිය සම්බන්ධයෙන් මඩකලපුව මූලස්ථාන පොලිසිය වැඩිදුර පරීක්ෂණ පවත්වයි.
