ක්‍රිෂ් ගනුදෙනුව සම්බන්ධයෙන් සැකපිට රිමාන්ඩ් භාරයට පත්කර සිටින පාර්ලිමේන්තු මන්ත්‍රී නාමල් රාජපක්ෂ සහ ක්‍රිෂ් සමාගමේ හිටපු අධ්‍යක්ෂවරියක වන ජානකී සිරිවර්ධන තවදුරටත් ලබන 23 වනදා දක්වා රිමාන්ඩ් භාරයේ තැබීමට කොළඹ මහේස්ත්‍රාත් අධිකරණය නියම කළේය.
මෙම නඩුකරය අද (16) කොළඹ ප්‍රධාන මහේස්ත්‍රාත් අසංග එස් බෝදරගම මහතා ඉදිරියේ කැඳවනු ලැබීය.
එහිදී රිමාන්ඩ් භාරයේ පසුවන නාමල් රාජපක්ෂ සහ ජානකි සිරිවර්ධන යන අයගේ ඇප ඉල්ලීම්වලට අදාළ නියෝග අද ප්‍රකාශයට පත් කිරීමට නියමිතව තිබුණි.
ඒ අනුව නඩුකරය කැඳවූ අවස්ථාවේදීත් මහේස්ත්‍රත්වරයා ප්‍රකාශය කළේ අද දින සැකකාර ජානකී සිරිවර්ධනගේ ඇප ඉල්ලීම පිළිබඳ නියෝගය පමණක් ප්‍රකාශයට පත් කරන බවය.
සැකකාර නාමල් රාජපක්ෂ මහතාට අදාළ ඇප ඉල්ලීම පිළිබඳ නියෝගය තමන්ට සූදානම් කරගත නොහැකි වූ බව සඳහන් කළ මහේස්ත්‍රාත්වරයා එම නියෝගය ඊළඟ දින ප්‍රකාශයට පත්කරන බවත් සඳහන් කළේය.
ඉන් අනතුරුව සැකකාර ජානකී සිරිවර්ධනගේ ඇප ඉල්ලීම පිළිබඳ නියෝගය ප්‍රකාශයට පත් කළ ප්‍රධාන මහේස්ත්‍රාත්වරයා "දූෂණ විරෝධී පනතේ 149 වන වගන්තිය ප්‍රකාරව ඇප ප්‍රදානය කිරීම සඳහා සුවිශේෂී කරුණු අධිකරණය හමුවේ තෘප්ත කළ යුතුයි. නමුත් මෙම සැකකාරිය සම්බන්ධයෙන් ඇප ඉල්ලීම්වලට අදාළව ඉදිරිපත් වූ කරුණු වලින් අදාළ නීතිමය ප්‍රතිපාදන තෘප්ත කළ හැකි කරුණු ඉදිරිපත් නෑ" ඒ අනුව සැකකාරියගේ ඇප ඉල්ලීම ප්‍රතික්ෂේප කරන බවත් මහේස්ත්‍රාත්වරයා සඳහන් කළේය.
ඒ අනුව සැකකාර ජානකී සිරිවර්ධන සහ නාමල් රාජපක්ෂ යන අය ලබන 23 වනදා දක්වා තවදුරටත් රිමාන්ඩ් භාරයේ තැබීමටද මහේස්ත්‍රත්වරයා නියම කළේය.
එදින සැකකාර නාමල් රාජපක්ෂ මහතාගේ ඇප ඉල්ලීම පිළිබඳ නියෝගය අධිකරණය විසින් ප්‍රකාශයට පත් කිරීමට නියමිතව ඇත.
ක්‍රිෂ් සමාගමේ කටයුතුවලට අදාළව රුපියල් මිලියන 70ක මුදලක් අල්ලස් වශයෙන් ලබාදීම සහ ලබාගැනීම ඇතුළු චෝදනා සම්බන්ධයෙන් අල්ලස් හෝ දූෂණ චෝදනා විමර්ශන කොමිෂන් සභාව විසින් සැකකරුවන් අත්අඩංගුවට ගෙන අධිකරණයට ඉදිරිපත් කර තිබේ.
