පූජ්‍ය ගලගොඩඅත්තේ ඥානසාර හිමි යළි අධිකරණයට ඉදිරිපත් කිරීමට පෙර, උන්වහන්සේ අයත් කෝට්ටේ ශ්‍රී කල්‍යාණි සාමග්‍රිධර්ම මහා සංඝ සභාව සමග සාකච්ඡාවක් සඳහා එක්වන්නැයි එම සංඝ සභාවේ අනුනායක මහාචාර්ය පූජ්‍ය කොටපිටියේ රාහුල හිමි ජනාධිපතිවරයාට ලිපියක් මගින් අද (09) දැනුම්දී තිබේ.
තම සංඝ සභාව සහභාගී කර නොගෙන නායක ස්වාමීන්ද්‍රයන් වහන්සේලා පිරිසක් සමඟ ඊයේ සාකච්ඡාවක් සිදුකළ අයුරු මාධ්‍ය ඔස්සේ දැක තම සංඝ සභාව මවිතයට පත්වූ බව උන්වහන්සේ සඳහන් කළේය.
එමඟින් උන්වහන්සේ පෙන්වා දී ඇත්තේ පූජ්‍ය ගලගොඩඅත්තේ ඥානසාර හිමියන් තම සංඝ සභාවේ භික්ෂුවක් වන බැවින් උන්වහන්සේගේ චීවරය තබාගැනීම හෝ ඉවත් කිරීම පිළිබඳව බලය ඇත්තේද තම සංඝ සභාවට බවය.
එසේ තිබියදී තම සංඝ සභාව සහභාගී කර නොගෙන ඊයේ (08) දින නායක ස්වාමීන්ද්‍රයන් වහන්සේලා පිරිසක් සමඟ සාකච්ඡාවක් සිදුකරනු ලැබූ පුවත මාධ්‍ය ඔස්සේ දැක තම සංඝ සභාව මවිතයට පත්වූ බව එම ලිපියේ සඳහන්වේ.
එමෙන්ම අදාළ කාරණය සුදුසු පරිදි විසඳී නැතැයි සිය විශ්වාස බව එහි දක්වා ඇත.
එබැවින් තම සංඝ සභාව සමග සාකච්ඡාවකට පැමිණෙන ලෙස එම ලිපියෙන් ජනාධිපතිවරයාට ඉල්ලීමක් කර තිබේ.
උපුටා ගැනීම…
අප මහා සංඝ සභාවටත් පොදුවේ සමස්ත මහා සංඝ රත්නයටත් බෞද්ධ සමාජයටත් බලපා ඇති මෙම ගැටලුව පිළිබඳ ඔබතුමා සමඟ සාකච්ඡා කිරීමට අප මහා සංඝ සභාවට අවශ්‍ය වී ඇත.
එබැවින් ඥානසාර හිමියන් නැවත අධිකරණයට ඉදිරිපත් කිරීමට පෙර අප වෙත දිනයක් සහ වේලාවක් ලබාදී ඓතිහාසික කෝට්ටේ රාජ මහා විහාරස්ථ සිරිමංගල උපෝසථාගාරයට අදාළ ඇමතිවරු සහ බෞද්ධ කටයුතු කොමසාරිස් ජනරාල්වරයා ද සමඟ පැමිණෙන ලෙස අතිගරු මහානායක නාහිමිපානන් වහන්සේගේ අනුමැතියෙන් ඔබතුමන් වෙත කරුණාවෙන් දන්වමි.
උපුටා ගැනීම අවසන්…
