රජය විසින් පාර්ලිමේන්තුවට ඉදිරිපත් කර තිබෙන ක්‍රිකට් පනත් කෙටුම්පතේ ඇතැම් වගන්ති ආණ්ඩුක්‍රම ව්‍යවස්ථාවට පටහැනි බවට තීන්දුවක් ලබාදෙන ලෙස ඉල්ලා ශ්‍රී ලංකා ක්‍රිකට් ආයතනයේ හිටපු නීති අංශ ප්‍රධානී, නීතිඥ ආචාර්ය චානක සේනානායක මහතා විසින් අද (8) ශ්‍රේෂ්ඨාධිකරණයට පෙත්සමක් ඉදිරිපත් කර තිබේ.
පෙත්සම්කරු සඳහන් කර ඇත්තේ, යෝජිත පනත් කෙටුම්පතේ ඇතැම් වගන්තිවලින් ක්‍රිකට් ක්‍රීඩාවට අගතියක් සිදුවන බවය.
යෝජිත පනත් කෙටුම්පතේ 32 වන වගන්තිය තුළින් ශ්‍රී ලංකා ක්‍රිකට් මහා සභා රැස්වීම්වල ඡන්දය දීමට හිමිකම් ඇත්තේ 'ඒ' සහ 'බී' කාණ්ඩයේ ක්‍රීඩා සමාජවලට සහ පළාත් ක්‍රිකට් සංගම්වලට පමණක් අවස්ථාව සලසා දී ඇති බවය.
යෝජිත පනත් කෙටුම්පත හරහා ඡන්ද බලය බස්නාහිර පළාතට බහුතර කේන්ද්‍රගත වීමක් දක්නට ලැබෙන අතර, බස්නාහිර පළාතෙන් බැහැර සෙසු දිස්ත්‍රික්කවල ක්‍රීඩා සංගම්වලට එම අයිතිය අහිමි කෙරෙන බවත් පෙත්සම තුළින් පෙන්වා දී තිබේ.
ඊට අමතරව අදාළ පනත් කෙටුම්පතේ 28 වන වගන්තිය තුළින් ජනාධිපතිවරයා ක්‍රිකට් ආයතනයේ 'අනුශාසක' ලෙස පත් කර ඇති බවත්, 22 වන වගන්තිය යටතේ ක්‍රිකට් අධ්‍යක්ෂ මණ්ඩලය සඳහා ස්වාධීන අධ්‍යක්‍ෂවරු තෝරනු ලබන මණ්ඩලයේ සාමාජිකයින් ලෙස ක්‍රීඩා අමාත්‍යංශ ලේකම්වරයා සහ ජාතික ක්‍රීඩා සභාවේ සභාපතිවරයා නිල බලයෙන් සාමාජිකත්වය දරන බවත් සඳහන් කර තිබේ.
මෙවැනි ප්‍රතිපාදන තුළින් ශ්‍රී ලංකා ක්‍රිකට් පරිපාලනයේ ස්වාධීනත්වයට හානි සිදුවන අතර, ඒ තුළින් ආණ්ඩුක්‍රම ව්‍යවස්ථාවේ 12(1) ව්‍යවස්ථාව මඟින් සහතික කර තිබෙන නීතිය ඉදිරියේ සමාන සැලකිලි ලැබීමට තිබෙන මූලික මිනිස් අයිතිවාසිකම් උල්ලංඝනය වන බවත් පෙත්සම්කරු සඳහන් කර ඇත.
ඒ අනුව අදාළ ප්‍රශ්නගත වගන්ති තුළින් ආණ්ඩුක්‍රම ව්‍යවස්ථාව මගින් සහතික කර තිබෙන මූලික මිනිස් අයිතිවාසිකම් උල්ලංඝනය වන බවට තීන්දුවක් ලබාදෙන ලෙසත් පෙත්සම්කරු ශ්‍රේෂ්ඨාධිකරණයෙන් ඉල්ලා තිබේ.
