අකුරේගොඩදී නීතීඥවරයෙකු හා ඔහුගේ බිරිඳ වෙඩිතබා ඝාතනය කිරීමේ සිද්ධියට සම්බන්ධයෙන් මොනරාගල පොලීසිය අත්අඩංගුවට ගත් දෙවන වෙඩික්කරු ගැන කරුණු රැසක් අනාවරණය කරගැනීමට හැකිව තිබේ.

නාවික හමුදාවෙන් නීත්‍යනුකූලව ඉවත් වූ අයෙකු වන ඔහු කරන්දෙණිය සුද්දාගේ විශ්වාසවන්තම හා දක්ෂතම වෙඩික්කරු බව වාර්තා වේ.

සැකකරු බන්ධනාගාර නිලධාරියෙකු ඇතුළු ඝාතන හයකට අදාළ වෙඩික්කරු ලෙස කටයුතු කර ඇතැයිද මේ වනවිට කරුණු අනාවරණ වී තිබේ.

මේ වනවිට අදාළ ද්විත්ව ඝාතනය සම්බන්ධයෙන් වෙඩික්කරුවන් දෙදෙනා ඊට ආධාර අනුබල දුන් කණ්ඩායමක් පොලිසිය විසින් අත්අඩංගුවට ගෙන ඇත.

අදාළ ඝාතන සිද්ධියේදී පිස්තෝල වර්ගයේ ගිනිඅවියක් භාවිතයෙන් වෙඩිතබා ඇත්තේ මෙම දෙවන වෙඩික්කරු වන අතර, ඔහුව අත්අඩංගුවට ගැනීම සඳහා පොලිසිය මහජන සහාය පතා ඔහුගේ ඡායාරූප කිහිපයක් මාධ්‍යවෙත නිකුත් කර තිබුණි.

එවන් පසුබිමක අදාළ පුද්ගලයා මොනරාගල, නක්කල, ටැංවත්ත ප්‍රදේශයේ නිවසක සැඟව සිටින බවට 119 පොලිස් හදිසි ඇමතුම් අංකයට ප්‍රදේශවාසියෙකුගෙන් තොරතුරක් ලැබී ඇත.

ඒ අනුව මොනරාගල පොලිසියේ නිලධාරීන් කණ්ඩායමක් ගොස් ඊයේ (24) රාත්‍රියේ අදාළ නිවස වටලා සැකකරුවන් තිදෙනෙකු අත්අඩංගුවට ගනු ලැබීය.

අනතුරුව ඔවුන්ගේ ඡායාරූප මගින් සැකකරුවන් පිළිබඳ තහවුරු කරගත් බස්නාහිර දකුණ අපරාධ කොට්ඨාසය, ඔවුන්ව දැඩි රැකවල් මැද කොළඹට රැගෙන ආවේය.

අත්අඩංගුවට ගත් පුද්ගලයන් තිදෙනාගෙන් අයෙක් කනංකේ ප්‍රදේශයේ පදිංචි 39 හැවිරිදි මනෝජ් උදයංග නම් හිටපු නාවික හමුදා සෙබළයාය.

ඔහු රූබස් රමේෂ් යන නමින්ද පෙනී සිට ඇති අතර, එම නමින් විදෙස් ගමන් බලපත්‍රයක්ද තිබී ඇතැයි පොලිසිය පවසයි.

වසර 11ක පමණ කාලයක් නාවික හමුදා සේවයේ සිට ඉන් නීත්‍යානුකූලව ඉවත්වූවෙක්ද වේ.

එලෙස සේවයෙන් ඉවත්වීමෙන් අනතුරුව කිසිදු රැකියාවක් සිදුනොකළ සැකකරු, දැඩි ලෙස මත්ද්‍රව්‍ය භාවිතයට ඇබ්බැහිවූවෙක් වන අතර, අත්අඩංගුවට පත්වන විටත් ඔහු සතුව හෙරොයින් හා කුෂ් මත්ද්‍රව්‍ය තිබී සොයාගෙන ඇත.

සොරකමක් සම්බන්ධයෙන් බන්ධනාගාරගතව සිටින කාලයේදී ඔහු සහ කරන්දෙණිය සුද්දා අතර සම්බන්ධතා ගොඩනැඟී ඇති බව පොලිසිය සඳහන් කළේය.

මේ අතර වෙඩික්කරු සමග අත්අඩංගුවට ගත් සැකකරුවන් දෙදෙනාගෙන් අයෙක් දිනුජන සඳරුවන් වන අතර, ඔහු අම්බලන්ගොඩ ප්‍රදේශයේ පදිංචිකරුවෙක්ය.

ඔහු නීතීඥවරයා ඝාතනය සඳහා වෙඩික්කරුන් පැමිණි මෝටර් රථය පැදවූ පුද්ගලයා බවට පොලිසිය සැකකරයි.

ඔහුගේ ඥාතීන් කිහිපදෙනෙකුම කරන්දෙණිය සුද්දාගේ සමීපතමයන් බවද වාර්තා වේ.

අත්අඩංගුවටගත් අනෙක් සැකකරු අංගොඩ ප්‍රදේශයේ පදිංචි කැළුම් සුජීව නැමැත්තෙකු වන අතර, ඔහු සැකකරුවන්ට නවාතැන් පහසුකම් ලබාදුන් අයෙක්ය.

එම සැකකරු මාර්ග සංවර්ධන කටයුතුවල නිරත අයෙකු වන අතර, ඔහු මොනරාගල ප්‍රදේශයේ කුලී පදනම මත ලබාගත් නිවසක සෙසු සැකකරුවන් සමග සිට ඇතැයි හෙළිවී ඇත.

ඔහු මීට සති දෙකකට පමණ ඉහතදී සෙල්ලකතරගම ප්‍රදේශයේ මාර්ග සංවර්ධන කටයුත්තක නිරතව සිටියදී අපරාධකරුවකු වන පෙතියාගොඩ සංඛ නැමැත්තා දුරකතනයෙන් ඔහු අමතා, "කොල්ලෙක් ඉන්නවා, වැඩට ගන්න"යනුවෙන් පවසා ඝාතනය සඳහා පැමිණි රියදුරු එහි එවා ඇති බව පොලිසිය සඳහන් කළේය.

පසුව එහි වැඩ නිමවීමෙන් පසුව ඔවුන් දෙදෙනා මොනරාගල ප්‍රදේශයේ නිවසට පැමිණ ඇති අතර, මීට දින 5කට පමණ ඉහතදී පෙතියාගොඩ සංඛ නැමැත්තා නැවත දුරකථන ඇමතුමක් ලබාදී වෙඩික්කරුද අදාළ නිවසට එවා ඇති බව වාර්තා වේ.