සංවිධානාත්මක අපරාධ කල්ලි සාමාජිකයෙකු සහ මත්ද්රව්ය ජාවාරම්කරුවෙකු වන ජයසේකර විතානගේ රුවන් චාමර නොහොත් මිදිගම රුවන් නැමැත්තා අද (29) දින කොටුව මහේස්ත්රාත් අධිකරණයට ඉදිරිපත්කළේය.
එහිදී ඔහුව දෙසැම්බර් 13 වනදා තෙක් රක්ෂිත බන්ධනාගාර ගතකළ බව අප අධිකරණ වාර්තාකරු පැවසීය.
රුවන්, නඳුන් චින්තක නොහොත් හරක් කටාගේ බිරිඳගේ සහෝදරයා වන අතර ඔහුගේ උපදෙස් මත සිදුකළ අපරාධ රැසකම මහමොළකරු ලෙසත් කටයුතු කර ඇති බව පොලීසිය පවසයි.
හරක් කටා අපරාධ පරීක්ෂණ දෙපාර්තමේන්තුවෙන් පැනයාමට ගත් උත්සාහයේ සැලසුම්කරු ලෙසද මිදිගම රුවන් හඳුනාගෙන ඇති බව පොලීසිය සඳහන් කළේය.
ත්රස්ත මර්දන කොට්ඨාස නිලධාරී කණ්ඩායමක් විසින් පසුගිය මැයි 31වනදා රුවන් ව ඩුබායිහි සිට දිවයිනට රැගෙන එනු ලැබීය.
අනතුරුව ඔහු කොළඹ ත්රස්ත මර්දන කොට්ඨාසය වෙත රැගෙන ගොස් ප්රශ්න කර තිබුණි.
මිදිගම රුවන් පසුගිය අප්රේල් මාසයේදී ඩුබායීහී රාත්රී සාමාජ ශාලාවක ඇතිවූ ගැටුමක් හේතුවෙන් එරට පොලීසිය මගින් අත්අඩංගුවට ගෙන තිබුණි.
ඒ ඔහුට එරෙහිව ජාත්යන්තර පොලීසිය මඟින් රතු නිවේදන නිකුත්කර තිබියදීය.
සැකකරු 2022 වසරේ අගෝස්තු 4 වනදා ගල්කිස්ස අධිකරණයේදී පුද්ගලයෙකුට වෙඩිතැබීමේ සිද්ධියේ ප්රධාන සැලසුම්කරු ලෙස නම් කෙරුණු අතර අපරාධ පරීක්ෂණ දෙපාර්තමේන්තුවේ මහජන පැමිණිලි අංශය ඔහුට එරෙහිව රතු නිවේදන නිකුත් කරන ලෙස ඉල්ලා තිබුණේ ඒ අනුවය.
