ගාමිණී ජයවික්‍රම පෙරේරා අභාවප්‍රාප්ත වෙයි
February 17, 2024 10:13 am
කෘතහස්ත දේශපාලනඥයකු වූ හිටපු අමාත්‍ය ගාමිණී ජයවික්‍රම පෙරේරා මහතා අද (17) කුරුණෑගල, කටුගම්පල පිහිටි සිය නිවසේ දී අභාවප්‍රාප්ත විය.
කලක් තිස්සේ අසනීප තත්ත්වයකින් සිටි ඒ මහතා මිය යන විට 83 වැනි වියේ පසු විය.
දේහය පිළිබඳ අවසන් කටයුතු පසු ව දැනුම්දෙන බව පවුලේ ඥාතීන් දැනුම් දී තිබේ.
1941 වසරේ කුරූණෑගල දී උපත ලැබූ ගාමිණී ජයවික්‍රම පෙරේරා, සක්‍රීය දේශපාලනයට පිවිසියේ 1968 වසරේ දී ය.
එක්සත් ජාතික පක්ෂයෙන් සිය දේශපාලන ගමන ආරම්භ කරන ජයවික්‍රම මහතා, 1977 වසරේ දී මුල්වරට පාර්ලිමේන්තු වරම් හිමිකරගත් අතර, 08 වැනි පාර්ලිමේන්තු වාරය දක්වා අඛණ්ඩ ව ඔහු පාර්ලිමේන්තුව නියෝජනය කළේය.
ජයවික්‍රම මහතා කලක් එක්සත් ජාතික පක්ෂයේ සභාපති ධුරය ද හොබවනු ලැබීය.
ජේ.ආර්. ජයවර්ධන සහ රණසිංහ ප්‍රේමදාස මහත්වරුන්ගේ ජනාධිපති ධුර සමයේ ආණ්ඩුවේ ප්‍රබල අමාත්‍ය ධුර හෙබවූ ඒ මහතා, අවසන් වරට යහපාලන ආණ්ඩු සමයේ මෛත්‍රීපාල සිරිසේන ජනාධිපතිවරයා යටතේ තිරසර සංවර්ධන හා වනජීවී කැබිනට් අමාත්‍යවරයා ලෙසත් බුද්ධ ශාසන අමාත්‍යවරයා ලෙසත් සිය වගකීම් ඉටුකළේ ය.
