පරිගණක අපරාධ විමර්ශන කොට්ඨාසයේ සමාජ මාධ්‍ය අපරාධ විමර්ශන අංශය විසින් තරුණයෙකුව අත්අඩංගුවට ගෙන තිබේ.

ඒ, නීතිවිරෝධී ලෙස විදෙස් ක්‍රෙඩිට් කාඩ්පත්වල දත්ත උපයෝගී කරගනිමින් අන්තර්ජාලය හරහා රුපියල් ලක්ෂ ගණනින් භාණ්ඩ මිලදී ගෙන සිදුකළ වංචාවක් සම්බන්ධයෙනි.

පොලීසිය පැවසුවේ, 18 හැවිරිදි සැකකරු සාමාන්‍ය පෙළ විභාගයේ විෂයයන් දෙකක් පමණක් සමත් පුද්ගලයකු වන අතර කුලී වැඩකර උපයාගත් මුදලින් දුරකතනයක් මිලදීගෙන ඒ ඔස්සේ අන්තර්ජාලයට පිවිස මෙම වංචාව සිදුකර ඇති බවය.

අන්තර්ජාලය හරහා භාණ්ඩ බෙදාහැරීමේ ආයතනයක් විසින් පරිගණක අපරාධ විමර්ශන කොට්ඨාසයේ සමාජ මාධ්‍ය අපරාධ විමර්ශන අංශයට පසුගියදා පැමිණිල්ලක් ගොනුකර තිබුණේ සැකකටයුතු අයුරුන් පුද්ගලයෙකු විසින් විදෙස් ක්‍රෙඩිට් කාඩ්පත් හරහා භාණ්ඩ මිලදීගන්නා බව පවසමිනි.

ඒ අනුව, ලද බුද්ධි තොරතුරක් ඔස්සේ විමර්ශනය කළ විමර්ශන නිලධාරීන් පසුගිය 5 වනදා කුරුණෑගල දුම්මලසූරිය ප්‍රදේශයේදී සැකකරුව අත්අඩංගුවට ගනු ලැබීය.

සැකකරුගෙන් සිදුකළ ප්‍රශ්න කිරීම්වලදී අනාවරණය වී ඇත්තේ විදෙස් ක්‍රෙඩිට් කාඩ්පත් ලක්ෂ 5ක පමණ දත්ත ඔහුගේ පරිගණකයේ ඇති බවය.

එම දත්ත භාවිත කරමින් සැකකරු රුපියල් ලක්ෂ 55 ක පමණ වටිනා භාණ්ඩ මෙරට සිට අන්තර්ජාලය හරහා ඇනවුම්කර ඒ අතරින් රුපියල් ලක්ෂ 10ත් 15ත් වටිනාකමකින් යුත් භාණ්ඩ මිලදීගෙන ඇති බවත් විමර්ශන නිලධාරීන් අනාවරණ කරගෙන තිබේ.

මොහු වැඩි වශයෙන් මිලදීගෙන ඇත්තේ සුවඳවිලවුන්, රූපලාවන්‍ය භාණ්ඩ, විදෙස් මත්පැන්, විවිධ කෑම වර්ග මෙන්ම කැමරා සහ පරිගණක උපකරණය.

භාණ්ඩ මිලදී ගැනීම සඳහා සැකකරු භාවිත කර ඇති ක්‍රෙඩිට් කාඩ්පත් විදෙස් රටවල් 10කට පමණ අයත් වන අතර එම රටවල් ඔහු විසින් තෝරාගෙන ඇත්තේ ජාත්‍යන්තර වශයෙන් තොරතුරු ලබාගැනීමට අපහසු රටවල් බවද විමර්ශන නිලධාරීන් අනාවරණ කරගෙන තිබේ.

ඒ අතරින් ඇතැම් ක්‍රෙඩිට් කාඩ්පත් විදෙස් බැංකුවලින් නිකුත් කිරීමට නියමිත ඒවා බවද වාර්තා වෙයි.

18 හැවිරිදි සැකකරු මෙම ජාවාරම සිදුකරන ආකාරය යූ ටියුබ් ඔස්සේ හදාරා ඇති බවද අනාවරණ වී තිබේ.

සැකකරු අලුත්කඩේ මහෙස්ත්‍රාත් අධිකරණයට ඊයේ (06) ඉදිරිපත් කිරීමෙන් අනතුරුව එළඹෙන ජනවාරි 12 වනදා දක්වා රක්ෂිත බන්ධනාගාර ගත කෙරුණි.

මෙම ජාවාරමට සම්බන්ධ තවත් ප්‍රධාන සැකකරුවන් කිහිප දෙනෙකු හඳුනාගෙන ඇති අතර ඔවුන්වද අත්අඩංගුවට ගැනීමට නියමිත බව පොලීසිය සඳහන් කරයි.