ගැටුම් නතර කිරීම සඳහා සාම ක්‍රියාවලියකට එක්වීමට රුසියාව යුක්‍රේනය වෙත තවත් එක් අවස්ථාවක් ලබාදී තිබේ.
බෙලරුස් දේශසීමාවේදී දෙපාර්ශවය අතර අද සාකච්ඡා පැවැත්වීමට නියමිතය.
මේ අතර යුක්‍රේන විදේස අමාත්‍ය දිමිත්‍රෝ කුලේබා "අපි වැටෙන්නේ නැහැ. අපි අපේ භූමියෙන් එක බිම් අඟලක්වත් අත්හරින්නේ නැහැ." යනුවෙන් පවසා තිබේ.
යුක්‍රේනය සාකච්ඡා සඳහා එළඹී ඇත්තේ, න්‍යෂ්ටික හමුදා සීරුවෙන් තබන්නැයි රුසියා ජනාධිපති විලැද්මීර් පුටින් නියෝග කර ඇති පසුබිමකය.
යුරෝපා සංගමය සහ බටහිර රටවල් රුසියාවට එරෙහිව දැඩි සම්බාධක පැනවීමෙන් අනතුරුව රුසියානු ජනාධිපතිවරයා එම නියෝගය නිකුත් කර තිබුණි.
අමෙරිකාව එය හෙළා දැක ඇති අතර ජනපති පුටින් පසුගිය සතියේ අනතුරු අඟවා සිටියේ ඔවුන්ට බාධා කිරීමට උත්සහ දරන ඕනෑම අයෙකුට ඉතිහාසයේ මෙතෙක් අත්දැක නැති ප්‍රතිවිපාක අත්විඳින්නට සිදුවනු ඇති බවටය.
මේ අතර අමෙරිකානු හිටපු ජනාධිපති ඩොනල්ඩ් ට්‍රම්ප් පවසන්නේ තමා ජනාධිපති ධුරයේ රැඳී සිටියේනම් මේ ව්‍යවසනය සිදුවීමට ඉඩ නොතබන බවය.
වත්මන් ජනාධිපති ජෝ බයිඩන්ගේ දුර්වල හා අදක්ෂ පාලනය යුක්‍රේනයේ වත්මන් තත්ත්වයට හේතු වී ඇති බවත් ඔහු සඳහන් කළේය.
ඔහු පෙන්වා දෙන්නේ එකල බලවත්, කපටි සහ බුද්ධිමත් ලෙස සැලකූ අමෙරිකාව දැන් මුග්ධ රටක් බවට පත්ව ඇති බවය.
අමෙරිකානු හිටපු ජනාධිපති ඩොනල්ඩ් ට්‍රම්ප්,
"මම ජනාධිපති වෙලා හිටියානම් නම් මේ බිහිසුණු ව්‍යසනය කවදාවත් සිද්ධ වන්නේ නැහැ. බුෂ් යටතේ රුසියාව ජෝර්ජියාව ආක්‍රමණය කළා. ඔබාමා යටතේ රුසියාව ක්‍රිමියාව අල්ලා ගත්තා. බයිඩන් යටතේ රුසියාව යුක්‍රේනය ආක්‍රමණය කළා. රුසියාව වෙනත් රටක් ආක්‍රමණය නොකළ 21 වැනි සියවසේ එකම ජනාධිපතිවරයා මමයි. ප්‍රශ්නය පුටින් බුද්ධිමත් වීම නොවේ, ඇත්ත වශයෙන්ම ඔහු දක්ෂද යන්නයි.නමුත් සැබෑ ප්‍රශ්නය වන්නේ අපේ නායකයන් එතරම්ම ගොළු වීමයි. පුටින් බෙරයක් වගේ බයිඩන් වාදනය කරනවා."
