රුසියාවේ න්‍යෂ්ටික ප්‍රහාර වැළැක්වීමේ හමුදා බළකායට සීරුවෙන් සිටින ලෙස ජනපති පුටින් නියෝග කර තිබේ.
මේ වන විට යුක්‍රේනයේ කියුව්, කාර්කිව් ඇතුළු රට පුරා ප්‍රදේශ රැසක තවදුරටත් දරුණු ප්‍රහාර එල්ල කරමින් සිටී.
මේ අතර, බෙලරුස් දේශ සීමාවේදී රුසියාව හා සාකච්ඡා සිදු කිරීමට යුක්‍රේන ජනාධිපතිවරයා කැමැත්ත ප්‍රකාශ කර තිබේ.
බෙලරුස් ජනාධිපති අලෙක්සන්දර් ලුකශෙන්කෝ සමග පැවති දුරකථන සාකච්ඡාවකින් අනතුරුව එම තීරණය ගෙන ඇති බව විදෙස් වාර්තා පැවසුවේය.
පෙර කොන්දේසි රහිතව පැවැත්වෙන සාකච්ඡාවකට එක්වීම සඳහා තමන් එකඟ වන බව යුක්‍රේන ජනාධිපතිවරයා ප්‍රකාශ කර ඇති බව සඳහන්ය.
කෙසේවෙතත් රුසියාවේ න්‍යෂ්ටික හමුදා සිරුවෙන් තබන ලෙස ව්ලැද්මීර් පුටින් සිදුකළ නියෝගයට අමෙරිකාව ප්‍රතිචාර දක්වා තිබේ.
එක්සත් ජාතීන්ගේ එක්සත් ජනපද තනාපතිනි ලින්ඩා තෝමස් ග්‍රීන් ෆිල්ට් පවසා ඇත්තේ එම පියවර පිළිගත නොහැකි තත්ත්වයක් බවය.
රුසියානු ජනාධිපතිවරයා එම යුද්ධය අඛණ්ඩව තීව්‍රර කරමින් පවතින බවද ඇය ප්‍රකාශ කර තිබේ.
මේ අතර යුක්‍රේනයේ නිෂ්පාදිත ඇන්ටනොව් 225 වර්ගයේ ගුවන් යානයක් රුසියානු ප්‍රහාර හමුවේ විනාශයට පත්ව ඇත.
මෙය ලොව විශාලතම භාණ්ඩ ප්‍රවාහන ගුවන් යානයක් ලෙස සැලකෙන අතර එහි දිගට වඩා අඩි විස්සක් පමණ ගුවන් යානයේ පියාපත් පළලින් යුක්ත බව විදෙස් වාර්තා සඳහන් කළේය.
එම ගුවන් යානයේ දිග අඩි 275ක් වන අතර පළල අඩි 290ක් වේ.
පසුගිය කොවිඩ් සමයේ දී වෛද්‍ය උපකරණ ප්‍රවාහනය සදහා එම ගුවන් යානය වැඩිවශයෙන් යොදාගෙන ඇති බව විදෙස් වාර්තා සඳහන් කළේය.
එමෙන්ම ඉන්ධන කිලෝ ලක්ෂ 3ක් ගබඩා කළ හැකි එම යානය 2018 වසරේ දී මත්තල ගුවන්තොටුපළ වෙතද පැමිණ තිබේ.
