රුසියානු ජනාධිපති ව්ලැදිමීර් පුටින්ගේ යුක්‍රේන ආක්‍රමණයට එරෙහිව රුසියාව ඇතුළු තවත් රටවල විරෝධතා ආරම්භ වී තිබේ.

විදෙස් මාධ්‍ය වාර්තා කළේ, රුසියානු රජය විරෝධතාකරුවන් 1,400ක් පමණ අත්අඩංගුවට ගෙන ඇති බවය.

ශ්‍රී ලංකාවේ රැඳීසිටින යුක්‍රේන සංචාරකයින් ද රුසියාව විසින් යුක්‍රේනය ආක්‍රමණය කිරීමට එරෙහිව සාමකාමී විරෝධතාවයක් සිදු කර තිබුණි.

ඒ අද කොළඹ රුසියානු තානාපති කාර්යාලය ඉදිරිපිටදීය.

මේ අතර අමෙරිකාව විසින් තවත් 7,000ක හමුදා භට පිරිසක් ජර්මනියට යැවීමට පියවර ගෙන ඇති අතර නේටෝ සන්ධානයේ කොටසක් වන එස්තෝනියාව, ලැට්වියාව සහ ලිතුවේනියාව යන පැරණි සෝවියට් සමූහාණ්ඩුව වන බෝල්ටික් කලාපය වෙත ඇමරිකානු හමුදා සාමාජිකයින් 800 දෙනෙකු ගෙන් යුත් පිරිසක් ස්ථාන ගත කිරීමට පියවර ගෙන තිබේ.

රුසියාවේ යුද ශක්තිය අඩපණ කිරීම සඳහා සයිබර් ප්‍රහාරයක් දියත් කිරීමේ වැදගත්කම අමෙරිකානු ආරක්ෂක අංශ ජනාධිපති ජෝ බයිඩන් වෙත යෝජනා කර තිබේ.

එහිදී අමෙරිකානු ජනාධිපතිවරයාට පෙන්වා දී ඇත්තේ සයිබර් ප්‍රහාරයක් එල්ල කිරීම මගින් රුසියානු හමුදාවන්ට අවශ්‍ය අතිරේක පහසුකම්, භට පිරිස් ප්‍රමාද කරවීම, රුසියාවේ දුම්රිය සේවය ඇතුළු ප්‍රවාහන කේෂ්ත්‍රය සහ විදුලිබල පද්ධතිය අඩපණ කළ හැකි බවය.

කෙසේ වුවද මෙම සයිබර් ප්‍රහාරය එල්ල කිරීම සම්බන්ධයෙන් අමෙරිකානු ජනාධිපතිවරයා මෙතෙක් අවසන් නියෝගයක් ලබාදී නැතැයි අමෙරිකා පුවත් ආරංචි මාර්ග වාර්තා කරයි.

මේ අතර රුසියානු යුක්‍රේන යුද ගැටුම ගැන රුසියාවේ හිටපු තානාපති උදයංග වීරතුංග මහතා පළ කළේ මෙවන් අදහසකි.

"මේ වෙනකොට කියුව්වලට 60km නෙමෙයි කියුව්වල ප්‍රධාන ප්‍රදේශයත් රුසියාව අල්ලගෙන ඉවරයි. මම එක එක හමුදා නිලධාරීන්ට වගේම ඒ රටේ සිටින අයට කතා කරනවා. ඒ අයගෙන් රුසියානු අය නෙමෙයි යුක්‍රේන් අය. නමුත් ඒ අය කිව්වේ කියුව්වල.. ඒ කියන්නේ අගනුවරේ ප්‍රධානම කොටසක් අල්ලගෙන කියලා. ලොකුම බියර් කර්මාන්තශාලාව තියෙන්නේ. ටැංකි ඇවිල්ලා එතන අල්ලගෙන තියෙනවා."

"මම දන්න තරමට දින දෙකක් ඇතුළත, යුක්‍රේන ජනාධිපතිවරයාව ඉලක්ක කර තියෙනවා කියලා ඔහුම ප්‍රකාශය කළේ නිකම්ම නෙමෙයි. ඔහුට ලැබිලා තියෙන ආරංචි මාර්ගවලින්. ඒක ඇත්තක්.
දැනට බලාපොරොත්තු වන විදිහට රුසියානු හමුදාව අද හෝ හෙට වෙනකොට යුක්‍රේන ජනාධිපිතවරයා කියුව් නගරයෙන් එළයට ගියේ නැත්නම් ග්‍රහණයට ගන්නවා කියන එක තමයි ඔවුන්ගේ ටාර්ගට් එක."

"ඒ තියෙන මිසයිල ප්‍රහාර ඊයේ ගහපු එකක්වත් වැරදුනේ නැහැ. ඊයේ එල්ල කරපු මිසයිල 83ම කිසිම තැනකින් ජනතාවට හානි වුණේ නැහැ."

වැඩිදුර තොරතුරු සඳහා මෙතැනින් පිවිසෙන්න