අපරාධ පරීක්ෂණ දෙපාර්තමේන්තුව මගින් අත්අඩංගුවට ගනු ලැබූ ලංකා ඛනිජ තෙල් නීතිගත සංස්ථාවේ ජාතික සේවක සංගමයේ සභාපති ආනන්ද පාලිත මහතා අද අධිකරණය විසින් රුපියල් ලක්ෂ 10 බැගින් වූ ශරීර ඇප දෙකක් මත මුදාහරිනු ලැබීය.

නියෝගය ප්‍රකාශයට පත්කරමින් අධිකරණය සඳහන් කළේ භාෂණයේ නිදහසට බාධා කිරීමට හැකියාවක් නොමැති බවය.

ආනන්ද පාලිත මහතාව අත්අඩංගුවට ගනු ලැබුවේ පසුගිය 19 වනදා මාධ්‍ය හමුවක් පවත්වමින් රට තුළ ඉන්ධන හිඟයක් ඇති බවට අසත්‍ය ප්‍රකාශයක් සිදුකළ බවට ලංකා ඛණිජ තෙල් නීතිගත සංස්ථාවේ කළමනාකාවරයෙකු විසින් සිදුකළ පැමිණිල්ලකට අනුව කළ විමර්ශනයකදීය.

එම මාධ්‍ය හමුවේදී ආනන්ද පාලිත මහතා පවසා තිබුණේ දින 11ක තරම් කෙටි කාලයක් සඳහා පමණක් ප්‍රමාණවත් ඉන්ධන ඇති බවය.

ඒ පිළිබඳව අපරධ පරීක්ෂණ දෙපාර්තමේන්තුව සිදුකළ විමර්ශණයේදී අනාවරණ කරගෙන තිබුණේ පසුගිය 19වනදා වනවිට ඛණිජ තෙල් නීතිගත සංස්ථාව සතුව පෙට්‍රල් මෙට්ට්‍රික්ටොන් 71,000ක් සහ ඩීසල් මෙට්‍රික්ටොන් 99,000ක් පවතින බවය.

ඒ අනුව ආනන්ද පාලිත මහතා මධ්‍ය හමුවේ අසත්‍ය තොරතුරු ප්‍රචාරය කිරීම හේතුවෙන් ඊයේ රාත්‍රියේ අපරාධ පරීක්ෂණ දෙපාර්තමේන්තුව මගින් අත්අඩංගුවට ගත්තේය.

අනාන්ද පාලිත මහතාව අලුත්කඩේ මහෙස්ත්‍රාත් අධිකරණය වෙත අද දහවල් ඉදිරිපත් කළේය.

එහිදී අපරාධ පරීක්ෂණ දෙපාර්තමේන්තුව ප්‍රකාශ කළේ ආනන්ද පාලිත මහතා විසින් ඛනිජ තෙල් සංස්ථාවේ තෙල් සංචිත පිළිබඳව ව්‍යාජ තොරතුරු ඇතුළත්ව කරන ලද මාධ්‍ය සාකච්ඡාව නිසා මහජනයා අතර කැලඹීමක් ඇති වූ බවය.

මෙහිදී ආනන්ද පාලිත මහතා වෙනුවෙන් පෙනී සිටි ජනාධිපති නීතීඥ ශ්‍රීනාත් පෙරේරා මහතා පැවසුවේ අදාළ මාධ්‍ය හමුව හේතුකොටගෙන ජනතාව කැළඹීමට පත්නොවූ බවය.

මින් පෙර විෂයභාර අමාත්‍යවරයා ඛනිජ තෙල් අරපිරිමැස්මෙන් භාවිත කරන ලෙසට කළ ප්‍රකාශයත් ආනන්ද පාලිත මහතා විසින් මාධ්‍ය හමුව පැවැත් වූ දිනට පසුදින රට වසාදමන බවට ජනාධිපතිවරයා විසින් සිදුකළ ප්‍රකාශයත් පදනම් කරගෙන ජනතාව ඉන්ධන ලබාගැනීම සඳහා කටයුතු කළ බවය.

එහිදී අපරාධ පරීක්ෂණ දෙපාර්තමේන්තුව අධිකරණයට පැවසුවේ සැකකරුට ඇප ලබාදීමට විරුද්ධවන්නේ මොහු නැවත නැවත මෙවැනි ප්‍රකාශ සිදුකළ හැකි බැවින් එම ප්‍රකාශ නැවත ජනතාව කැළඹීමට පත්විය හැකි නිසා බවය.

මහෙස්ත්‍රාත්වරයා පැවසුවේ භාෂණයේ නිදහස යටතේ එය නැවැත්විය නොහැකි බවය.

ඒ අනුව ආනන්ද පාලිත මහතාව රුපියල් ලක්ෂ 10 බැගින් වූ ශරීර ඇප දෙකක් මත මුදා හැරීමට අධිකරණයට නියෝග කළේය.