නව කොරෝනා වෛරසය, අමෙරිකානු හමුදා භටයන්ගේ මාර්ගයෙන් චීනයේ වූහාන් නගරයට ඇතුල්වූ බවට චීන රජයේ ප්‍රකාශකයෙක් චෝදනා කර තිබේ.
අමෙරිකාව තුළ වෛරසයේ ව්‍යාප්තිය පිළිබඳ සත්‍ය තොරතුරු වසන් කරන බවටත් ඔහු මෙහි දී චෝදනා කර තිබුණි.
මේ අතර කැනේඩියානු අගමැති ජස්ටින් ටෘඩෝගේ බිරිඳටත් නව කොරෝනා වෛරසය ආසාදනය වී ඇති බව අද(13) තහවුරු විය.
චීනයෙන් ආරම්භ වී ලොවපුරා පැතිරගිය නව කොරෝනා වෛරසයට මේවන විට ලොවපුරා රටවල් 120ක් ගොඳුරු වී අවසන්.
ඒ හේතුවෙන් වාර්තා වී ඇති පුද්ගල මරණ සංඛ්‍යාව 4720ක්.
සමස්ත ආසාදිතයන් ගණන එක්ලක්ෂ විසිහත් දහස ඉක්මවන අතර සුවය ලැබූ පිරිසද හැට අටදහසකට අධිකයි.
නව කොරෝනා වෛරසයෙන් ඉන්දියාවේ සිදුවූ පළමු මරණය කර්ණාටක ප්‍රාන්තයෙන් ඊයේ(12) වාර්තා විය.
මෙලෙස මියගොස් ඇත්තේ 76 හැවිරිදි පුද්ගලයෙක් වන අතර ඔහු සෞදි අරාබිය සිට යළි ඉන්දියාවට පැමිණ තිබුණේ පෙබරවාරි 29වන දායි.
මේ වන විට එරටින් හමුවී ඇති සමස්ථ ආසාදිතයන් ගණන 73ක්.
නව කොරෝනා වෛරසය හේතුවෙන් චීනය තුළ මියගිය සංඛ්‍යාව 3,180 ක් වන අතර ආසාදිතයින් 81,000 ක් එරටින් වාර්තා වෙයි.
වෛරසය අසාදනය වීමෙන් පසු සුව වූ සංඛ්‍යාව 64,216 ක්.
එමෙන්ම චීනය තුළ වෛරසය පැතිරයාමේ උච්චතම අවස්ථාව සිය රටෙන් ඉවත්ව ගොස් ඇති බව චීනය නිලවශයෙන් ප්‍රකාශ කළේය.
