කොවිඩ් නයින්ටීන් හෙවත් නව කොරෝනා වෛරසයේ සැක සහිත රෝග ලක්ෂණ පෙන්නුම් කිරීම හේතුවෙන් පොලොන්නරුව මහ රෝහලට ඇතුළත් කළ පුද්ගලයින් දෙදෙනෙකු අයි.ඩී.එච් රෝහලට මාරුකර යැවිමට රෝහල් බලධාරින් පියවර ගෙන ඇත.
කන්දකාඩු නිරෝධායන මධ්යස්ථානයේ රඳවා සිටි පුද්ගලයෙකු සහ සෝමාවතිය වන්දනාවට පැමිණි පුද්ගලයෙකු සැක සහිත රෝග ලක්ෂණ පෙන්නුම් කිරීම හේතුවෙන් අද උදෑසන පොලොන්නරුව මහ රෝහලට ඇතුළත් කළ බවයි රෝහල් අධ්යක්ෂ වෛද්ය සම්පත් ඉන්දික කුමාර මහතා පැවසුවේ.
ඉතාලියේ සිට මෙරටට පැමිණ ඇති ඔවුන් දෙදෙනා 43 හැවිරිදි සහ 53 හැවිරිදි කොළඹ සහ ගම්පහ දිස්ත්රික්කවල පදිංචිකරුවන් බව සඳහන්.
ඉන් එක් අයෙකු නිරෝධායන ක්රියාවලිය ආරම්භ වීමට පෙර මෙරටට පැමිණි අයෙකු බවයි වාර්තා වන්නේ.
කෙසේවෙතත් එම පුද්ගලයින් දෙදෙනාට වෛරසය ආසාදනය වී ඇති බවට මෙතෙක් තහවුරුවී නොමැති අතර අයි.ඩී.එච් රෝහලේදී ඉදිරි පරික්ෂණ කටයුතු සිදුකිරිමට නියමිතයි.
