ඓතිහාසික රුහුණු මහා කතරගම දේවාලයේ 2026 වර්ෂයේ ඇසළ මංගල්‍යය අද (15) දින සිට ආරම්භ වීමට නියමිතය.
ඇසළ මංගල්‍යයට සමගාමීව තෙරුවන්ගේ හා දෙවියන්ගේ ආශීර්වාදය ප්‍රාර්ථනා කරමින් පවත්වනු ලබන සර්වරාත්‍රික පරිත්‍රාණ ධර්ම දේශනාව ඊයේ (14) දින රාත්‍රියේ දේවාල භූමියේ පිහිටි පිරිත් මණ්ඩපයේදී පැවැත්වුණි.
රුහුණු මාගම් පත්තුවේ ප්‍රධාන සංඝනායක, කතරගම කිරිවෙහෙර රාජමහා විහාරාධිපති, රාජකීය පණ්ඩිත පූජ්‍ය කොබවක ධම්මින්ද නාහිමියන්ගේ සහ රුහුණු මාගම් පත්තුවේ ප්‍රධාන අධිකරණ සංඝනායක, ශ්‍රී අභිනවාරාම විහාරාධිපති, ශාස්ත්‍රපති පූජ්‍ය කපුගම සරණතිස්ස නාහිමියන්ගේ අනුශාසනා පරිදි මෙම පින්කම සංවිධානය කර තිබුණි.
රුහුණු මහා කතරගම දේවාලයේ බස්නායක නිළමේ ආරච්චිගේ තිළිණ මධුසංක මහතාගේ මෙහෙයවීමෙන් මෙම පින්කම පැවැත්වුණි.
මෙම අවස්ථාව සඳහා කතරගම ප්‍රාදේශීය සභාවේ සභාපති ධර්මපාල හේරත්, කතරගම දේවාලයේ ප්‍රධාන කපුධුරන්ධර සරත් සේපාල ටී. රත්නායක, කතරගම ප්‍රාදේශීය ලේකම් ප්‍රගීත් කුලතිලක සහ මොනරාගල දිස්ත්‍රික් ලේකම් ඒ. ජී. නිශාන්ත යන මහත්වරුන් ඇතුළු පිරිසක් සහභාගි වී සිටියහ.
අද දින ආරම්භ වූ මෙම ඓතිහාසික පෙරහැර මංගල්‍යය දින 15ක් පුරා පැවැත්වෙන අතර, ලබන 29 වෙනිදා රාත්‍රියේ අවසන් මහා රන්දෝලි පෙරහැර වීදි සංචාරය කිරීමට නියමිතය.
අනතුරුව ලබන 30 වැනිදා උදෑසන මැණික් ගඟේ දියකැපීමේ මංගල්‍යය පැවැත්වීමෙන් පසු මෙවර ඇසළ මංගල්‍යය නිල වශයෙන් නිමාවට පත්වේ.
මේ වන විට පාද යාත්‍රාව ඔස්සේ බැතිමතුන් 24,568 දෙනෙකු කතරගම පූජා භූමිය වෙත පැමිණ සිටිති.
