පසුගිය රජය සමයේ විද්යුත් විසා නිකුත් කිරීමේ කටයුතු පෞද්ගලික සමාගම් වෙත පැවරීම සඳහා ඇතිකර ගෙන තිබෙන ගිවිසුම්වල නීත්යානුකූල භාවය පිළිබඳව යළි සලකා බැලීමට වත්මන් අමාත්ය මණ්ඩලය තීරණය කර ඇතැයි නීතිපතිවරයා අද (10) ශ්රේෂ්ඨාධිකරණයට දැනුම් දුන්නේය.
ඉකුත් රජය සමයේ විද්යුත් විසා නිකුත් කිරීමේ ක්රියාවලිය පුද්ගලික සමාගම්වලට පැවරීමට එවක අමාත්ය මණ්ඩලය විසින් ගනු ලැබූ තීරණය අභියෝගයට ලක් කරමින් හිටපු පාර්ලිමේන්තු මන්ත්රීවරුන් වන ජනාධිපති නීතීඥ එම් ඒ සුමන්දිරන්, පාඨලී චම්පික රණවක සහ වත්මන් පාර්ලිමේන්තු මන්ත්රී රවුෆ් හකීම් විසින් ගොනු කරන ලද මූලික අයිතිවාසිකම් පෙත්සම් අද කැඳවූ අවස්ථාවේදී නීතිපතිවරයා වෙනුවෙන් පෙනී සිටි අතිරේක සොලිසිටර් ජෙනරාල් විවේකා සිරිවර්ධන මහත්මිය මෙම දැනුම් දීම සිදුකළාය.
පෙත්සම් අගවිනිසුරු ප්රීති පද්මන් සූරසේන. අචල වෙංගප්පුලි හා අර්ජුන ඔබේසේකර යන මහත්වරුන්ගෙන් සමන්විත ත්රිපුද්ගල ශ්රේෂ්ඨාධිකරණ විනිසුරු මඩුල්ල ඉදිරියේ කැදවනු ලැබීය.
අදාළ පෙත්සම් කැඳවූ අවස්ථාවේදී නීතිපතිවරයා වෙනුවෙන් පෙනී සිටි අතිරේක සොලිසිටර් ජෙනරාල්වරිය අධිකරණය හමුවේ කරුණු දක්වමින් මෙම විද්යුත් වීසා නිකුත් කිරීමේ ක්රියාවලිය සම්බන්ධයෙන් පෞද්ගලික සමාගම් සමග ඇති කරගත් ගිවිසුම්වල නීත්යානුකූල භාවය පිළිබඳව පරීක්ෂා කිරීම සඳහා වත්මන් අමාත්ය මණ්ඩලය විසින් අනු කමිටුවක් පත් කර ඇති බවය.
එම කමිටුව අදාළ කරුණු අධ්යයනය කරමින් සිටින බව සඳහන් කළ අතිරේක සොලිසිටර් ජෙනරාල්වරිය එම කටයුතුවල ප්රගතිය දැනුම් දීම සඳහා දිනයක් ලබාදෙන ලෙස ඉල්ලා සිටියාය.
එම අවස්ථාවේදී පෙත්සම්කරුවකු වූ ජනාධිපති නීතිඥ එම්.ඒ. සුමන්දිරන් අධිකරණය හමුවේ කරුණු දක්වමින් මෙම ගනුදෙනුව අවලංගු කිරීමට වත්මන් රජය තීරණය කර තිබුණත් මෙම පෙත්සම ඉදිරියට පවත්වාගෙන යාමට අපේක්ෂා කරන බව සඳහන් කළේය.
එමෙන්ම වත්මන් කැබිනට් මණ්ඩලයේ සාමාජිකයන් මෙම පෙත්සමේ වගඋත්තරකරුවන් ලෙස නම් කර ඇති බව ජනාධිපති නීතිඥවරයා මෙහිදී පැවසුවේය.
ඒ අනුව වත්මන් අමාත්ය මණ්ඩල සාමාජිකයින්ට නොතිසි නිකුත් කිරීමට පියවර ගන්න ලෙස පෙත්සම්කාර පාර්ශවයට නියම කළ විනිසුරු මඩුල්ල මෙම පෙත්සම යළි සැප්තැම්බර් මස 29 වනදා කැඳවන ලෙස නියෝග කළේය.
