වසරේ මේ දක්වා කාල සීමාව තුළ සිදුවූ රිය අනතුරුවලින් පුද්ගලයින් 1,424 දෙනෙකු මියගොස් ඇති බව පොලිසිය පවසයි.
ජනවාරි 01 වැනිදා සිට ජූලි 05 වැනිදා දක්වා වූ කාලය තුළ මාරක අනතුරු 1,355ක් සිදුව ඇති බව පොලිස් රථ වාහන පාලන සහ මාර්ග ආරක්ෂාව පිළිබඳ අධ්යක්ෂ, ජ්යෙෂ්ඨ පොලිස් අධිකාරී මනෝජ් රණගල මහතා පැවසීය.
ඔහු මෙම අදහස් පළ කර සිටියේ ජාතික අනතුරු වැළැක්වීමේ සතිය පිළිබඳව දැනුවත් කිරීම සඳහා රජයේ ප්රවෘත්ති දෙපාර්තමේන්තු ශ්රවණාගාරයේ පැවති මාධ්ය හමුවකට එක්වෙමිනි.
2025 වසරේ අදාළ කාලසීමාවට සාපේක්ෂව මෙවර සමස්ත මාර්ග අනතුරු සංඛ්යාව 108කින් සහ මියගිය සංඛ්යාව 110කින් ඉහළ ගොස් ඇති බැවින් මෙය ඉතා බරපතළ තත්ත්වයක් වන බව ද එහිදී ඔහු පෙන්වා දුන්නේය.
දිනෙන් දින මාර්ග අනතුරු ඉහළ යාමට රියදුරන්ගේ අනවධානය, අපරීක්ෂාකාරී බව, අධික වේගය, මාර්ගවල පවතින දුර්වලතා මෙන්ම වාහන නිසි ලෙස නඩත්තු නොකිරීම නිසා ඇතිවන කාර්මික දෝෂ ද ප්රධාන වශයෙන් හේතු වන බව ජ්යෙෂ්ඨ පොලිස් අධිකාරීවරයා මෙහිදී සඳහන් කළේය.
එමෙන්ම පවතින සංඛ්යාලේඛන දත්තවලට අනුව මෙම අනතුරුවලින් ජීවිතක්ෂයට පත්ව ඇති අයගෙන් වැඩි පිරිසක් පදිකයන් සහ යතුරුපැදිකරුවන් වන බව ද එහිදී ඔහු පෙන්වා දුන්නේය.
ඒ අනුව ගතවූ මාස 7ක කාලය තුළ පමණක් යතුරුපැදිකරුවන් 488දෙනෙකු සහ පදිකයන් 484දෙනෙකු මාර්ග අනතුරු හේතුවෙන් ජීවිතක්ෂයට පත්ව ඇති බවද සඳහන්.
එහිදී වැඩිදුරටත් අදහස් දැක්වූ පොලිස් රථ වාහන පාලන සහ මාර්ග ආරක්ෂාව පිළිබඳ අධ්යක්ෂ, ජ්යෙෂ්ඨ පොලිස් අධිකාරී මනෝජ් රණගල මහතා,
"දිනෙන් දින මාර්ග අනතුරු වැඩිවීමක් සිදුවෙනවා. රිය අනතුරු සිදුවෙන්න හේතුව එකක් තමයි රියදුරාගේ අනවධානය සහ අපරීක්ෂාකාරී බව සහ අධික වේගයෙන් රියදුරාගේ නොසැලකිලිමත්කම තමයි නිගමනය වෙන්නේ. අනෙක් එක තමයි මාර්ගයේ තියෙන දුර්වලතා. ඒ වගේම තියෙනවා කාර්මික දෝෂ. ඒ කියන්නේ රථය හරියට නඩත්තු නොකිරීම නිසා රිය අනතුරු බොහොමයක් සිද්ධ වෙනවා. 2026.01.01 සිට 2026.07.05 වෙනි දිනට මාර්ග අනතුරු වෙලා තියෙනවා 1,355ක්. ඒකෙන් 1,424 ක් මිය ගිහිල්ලා තියෙනවා. ඒ කියන්නේ අපි සමස්තයක් වශයෙන් ගත්තොත් 2025 ඒ වකවානුවත් 2026 මේ වකවානුවත් ගත්තොත් එහෙම මාර්ග අනතුරු 108ක වැඩිවීමක් තියෙනවා. මියගිය සංඛ්යාව 110ක වැඩිවීමක් තියෙනවා. ඒ හින්දා මේක බරපතල තත්ත්වයක්. ඇත්ත වශයෙන්ම අපි බැලුවොත් එහෙම සංඛ්යාලේඛන වශයෙන් ගත්තොත් එහෙම මේ රිය අනතුරුවලින් වැඩියෙන්ම මිය යන්නේ පදිකයන්. පදිකයන් මියගිහින් තියෙනවා 484ක්. එතකොට යතුරුපැදිකරුවන් මියයනවා 488ක්. මෙන්න මේ දෙගොල්ලෝ තමයි වැඩියෙන්ම මාර්ග රිය අනතුරුවලින් මිය යන්නේ සහ බරපතළ තුවාල ලබන්නේ."
