Instagram හරහා ළමා ලිංගික අපයෝජන ද්‍රව්‍ය ප්‍රවර්ධනය කරන සහ ඒ සඳහා පහසුකම් සපයන සියලුම ගෙවුම් දැන්වීම් සහ අන්තර්ගතයන් වහාම අක්‍රීය කරන ලෙස ඉන්දීය රජය Meta සමාගමට දැඩි ලෙස නියෝග කර තිබේ.

විදෙස් පුවත් නාලිකාව විසින් සිදුකරන ලද විශේෂ ගවේෂණාත්මක අනාවරණයකින් පසුව ඉන්දීය රජය මෙම පියවර ගෙන ඇත.

ඉන්දියාව තුළ ඉන්ස්ටග්‍රෑම් හරහා ළමා ලිංගික අපයෝජන ද්‍රව්‍ය ප්‍රවර්ධනය කෙරෙන ගෙවුම් දැන්වීම් පළ කර ඇති බවත්, ඉන් සමහරක් මඟින් පරිශීලකයන්ව එම ද්‍රව්‍ය අලෙවි කරන ටෙලිග්‍රෑම් (Telegram) චැනල වෙත යොමු කර ඇති බවත් එම විමර්ශනයේදී හෙළි වී තිබේ.

මෙවැනි දරුණු ගණයේ අන්තර්ගතයන් සහිත දැන්වීම් තම සමාජ මාධ්‍ය ජාලය තුළ පළ කිරීමට ඉඩ දුන්නේ කෙසේද යන්න පිළිබඳව සතියක් ඇතුළත සවිස්තරාත්මක පැහැදිලි කිරීමක් ලබා දෙන ලෙස ද ඉන්දීය රජය මෙටා සමාගමෙන් ඉල්ලා ඇත.

මේ සම්බන්ධයෙන් ප්‍රකාශයක් කරමින් මෙටා සමාගමේ ප්‍රකාශකයෙකු පවසා ඇත්තේ, දැන්වීම් ඇතුළුව ළමා ලිංගික අපයෝජන ද්‍රව්‍ය ඉල්ලා සිටීම හෝ බෙදා හැරීම සම්බන්ධයෙන් තම සමාගම Zero-tolerance ප්‍රතිපත්තියක් අනුගමනය කරන බවය.

"වැරදි සහගත අන්තර්ගතයන් සහ පුද්ගලයන් කල්තියා හඳුනා ගැනීමට අපි දියුණු කෘත්‍රිම බුද්ධි (AI) තාක්ෂණය භාවිතා කරනවා. නමුත් අපගේ බිලියන 3.5ක් වන පරිශීලකයන් අතර සැඟවී අපගේ පද්ධති මඟහැරීමට උත්සාහ කරන අපරාධකරුවන් සමඟ අපි නිරන්තර සටනක නිරත වෙමින් සිටිනවා." යැයි එම ප්‍රකාශකයා වැඩිදුරටත් පැවසීය.

මේ අතර ටෙලිග්‍රෑම් සමාගම ප්‍රකාශ කර ඇත්තේ 2026 වසර තුළදී පමණක් ළමා ලිංගික අපයෝජන ද්‍රව්‍යවලට අදාළ ගෘප් (Groups) සහ චැනල (Channels) 274,000කට වඩා වැඩි ප්‍රමාණයක් තම පද්ධතියෙන් ඉවත් කිරීමට පියවර ගත් බවය.

පරිශීලකයන් සෙවුම් නොකළ ද, ඉන්ස්ටග්‍රෑම් පද්ධතිය විසින් ලිංගික වශයෙන් උත්තේජනය කරවන අන්තර්ගතයන් ඉදිරිපත් කරන බව නිරීක්ෂණය වීමෙන් පසුව ඉහත සඳහන් කළ විදෙස් මාධ්‍ය ආයතනය විසින් ඉන්දියාව තුළ ව්‍යාජ ඉන්ස්ටග්‍රෑම් ගිණුමක් සකස් කර තිබේ.

එම ගිණුම හරහා එවැනි Profiles 10ක් Follow කර ඇති අතර, සතියකටත් අඩු කාලයකදී එම ව්‍යාජ ගිණුමට වැඩිහිටි කාමුක දර්ශන සහිත ගෙවුම් දැන්වීම් ඉන්ස්ටග්‍රෑම් විසින් පෙන්වීමට පටන් ගෙන ඇත. දින කිහිපයකට පසු, ළමා ලිංගික අපයෝජන ද්‍රව්‍ය ප්‍රවර්ධනය කරන දැන්වීම් ද ඊට දර්ශනය වී ඇති අතර, ඒවායින් සමහරක් ටෙලිග්‍රෑම් චැනල වෙත Links සපයා තිබේ.

මෙම චෝදනාවලට පිළිතුරු දෙමින් මෙටා සමාගම පවසා සිටියේ ළමා සූරාකෑම යනු භයානක අපරාධයක් වන අතර එය වැළැක්වීමට තමන් දැඩි ලෙස කටයුතු කරන බවයි. කෙසේ වෙතත්, සමාගම ලාභය වෙනුවෙන් ආරක්ෂාව පසෙකලා මෙවැනි දැන්වීම් හිතාමතාම ඉලක්කගත පරිශීලකයන් වෙත යොමු කළ බවට නැඟෙන චෝදනා "සම්පූර්ණයෙන්ම සාවද්‍ය" බව පවසමින් මෙටා සමාගම එය ප්‍රතික්ෂේප කර තිබේ.