ඩෙංගු සහ වෛරස් උණ ව්‍යාප්තිය හේතුවෙන් කොළඹ සෞන්දර්ය කලා විශ්වවිද්‍යාලය සති දෙකක කාලයක් සඳහා තාවකාලිකව වසා දැමීමට තීරණය කර තිබේ.
ඒ අනුව, විශ්වවිද්‍යාලයේ සියලු අධ්‍යයන කටයුතු, විභාග සහ නේවාසිකාගාර වහාම ක්‍රියාත්මක වන පරිදි තාවකාලිකව වසා දමා ඇති බව විශ්වවිද්‍යාල ප්‍රතිපාදන කොමිෂන් සභාවේ සභාපති මහාචාර්ය කපිල සෙනෙවිරත්න මහතා පැවසීය.
විශ්වවිද්‍යාලය යළි විවෘත කිරීමට නියමිතව ඇත්තේ ජූලි 13 වැනිදා බවද ඔහු සඳහන් කළේය.
ඩෙංගු ව්‍යාප්තිය සම්බන්ධයෙන් විශ්වවිද්‍යාල ප්‍රතිපාදන කොමිෂන් සභාව ඊයේ සියලු රාජ්‍ය විශ්වවිද්‍යාලවල උපකුලපතිවරුන් සමඟ විශේෂ සාකච්ඡාවක් පවත්වා ඇති අතර, එහිදී විශ්වවිද්‍යාලවල පවතින සෞඛ්‍ය තත්ත්වය සහ ගත යුතු ක්‍රියාමාර්ග පිළිබඳව අවධානය යොමු කර තිබේ.
සෞන්දර්ය කලා විශ්වවිද්‍යාලයේ ශිෂ්‍ය ශිෂ්‍යාවන් කිහිපදෙනෙකු ඩෙංගු ආසාදිතයන් ලෙස හඳුනාගෙන ඇති අතර, ඊට අමතරව වෛරස් උණ තත්ත්වයක්ද පැතිර යමින් පවතින බව මහාචාර්ය කපිල සෙනෙවිරත්න මහතා ප්‍රකාශ කළේය.
අදාළ මහජන සෞඛ්‍ය පරීක්ෂකවරුන්ගේ සහ වෛද්‍ය නිලධාරීන්ගේ නිර්දේශ මත විශ්වවිද්‍යාලය තාවකාලිකව වසා දැමීමට තීරණය කර ඇති බවද ඔහු පැවසීය.
මේ අතර, අනෙකුත් රාජ්‍ය විශ්වවිද්‍යාල වසා දැමීමේ අවශ්‍යතාවක් මේ වන විට නොමැති බවත්, ඒවායේ අධ්‍යයන කටයුතු සාමාන්‍ය පරිදි පවත්වාගෙන යා හැකිද යන්න සෞඛ්‍ය අංශ සමඟ අඛණ්ඩව සමාලෝචනය කරන බවත් විශ්වවිද්‍යාල ප්‍රතිපාදන කොමිෂන් සභාවේ සභාපතිවරයා වැඩිදුරටත් සඳහන් කළේය.
