දන්ත වෛද්ය සංගමයේ (SLDA) 93 වැනි වාර්ෂික විද්යාත්මක සැසිවාරය අග්රාමාත්ය ආචාර්ය හරිනි අමරසූරියගේ ප්රධානත්වයෙන් පැවැත්විණි.
මෙම සැසිය හරහා මෙරට මුඛ සෞඛ්ය සම්බන්ධයෙන් විද්යාත්මක අත්හදාබැලීම්, රෝග වැළැක්වීම සහ සියලු දෙනාටම ප්රවේශ විය හැකි සෞඛ්ය සේවාවන් ප්රවර්ධනය කිරීම පිළිබඳව අවධානය යොමු ව ඇත.
මෙහිදී අග්රාමාත්ය ආචාර්ය හරිනි අමරසූරිය අතින් රන් පදක්කම්ලාභී වෛද්ය ශිෂ්ය ශිෂ්යාවන්, පර්යේෂකයන් සහ ශිෂ්යත්වලාභීන් ඇගයීමටලක් වූ අතර එම ජයග්රහණ ශ්රී ලංකාවේ නවෝත්පාදන මූලික කරගත් සෞඛ්ය සේවා වෘත්තිකයන් බිහිකිරීම සඳහා අධ්යාපනය ආයතනවල කැපවීම පිළිබිඹු කරන බව ද අග්රාමාත්යතුමිය සඳහන් කළාය.
දශක නවයකට අධික ඉතිහාසයකට හිමිකම් කියන ශ්රී ලංකා දන්ත වෛද්ය සංගමයේ කාර්යභාරය අගය කළ අග්රාමාත්යතුමිය, දැනුම ප්රවර්ධනය කිරීම සහ වෘත්තීය ප්රමිතීන් ආරක්ෂා කිරීම සඳහා එහි දීර්ඝකාලීන මෙහෙවර පැසසුමට ලක් කළාය.
මහජන සෞඛ්යය යනු රෝහල්වලට පමණක් සීමා වූවක් නොවන බවත්, යහපත් සෞඛ්යයක් ආරම්භ වන්නේ රෝග වළක්වා ගැනීමට උපකාරී වන සෞඛ්ය සම්පන්න ජීවන රටාවකින් බවත් අග්රාමාත්යතුමිය සඳහන් කළා ය.
"මුඛ සෞඛ්යය සෞඛ්ය සම්පන්න ජීවන රටාවක අත්යවශ්ය අංගයක්. නිරෝගී සිනහවක් යනු ශක්තිමත් දත් තිබීම පමණක් නොවේ. එය යහපත් පෝෂණය, දරුවෙකුගේ ඉගෙනීමේ හැකියාව, වැඩිහිටියෙකුගේ වැඩ කිරීමේ හැකියාව මෙන්ම සෑම පුද්ගලයෙකුගේම සමස්ත යහපැවැත්ම සහ ගෞරවය සමඟ සෘජුවම සම්බන්ධ වනවා," යනුවෙන් ද අග්රාමාත්යවරිය වැඩිදුරටත් පැවසීය.
එහිදී ඇය සඳහන් කර සිටියේ දැනට බිලියන 3.5කට ආසන්න පිරිසක් මුඛ රෝගවලින් පීඩා විඳින බවත් මෙරට තුළ ද දරුවන් අතර දන්ත රෝග, වැඩිහිටියන් අතර විදුරුමස් ආශ්රිත රෝග මෙන්ම දුම්කොළ භාවිතය, මුඛ පිළිකා අභියෝග බවට පත් ව ඇති බවය.
එමෙන්ම බෝ නොවන රෝග ව්යාප්තිය අවම කිරීම සහ සෞඛ්ය සේවා පද්ධතියක් ශක්තිමත් කිරීම සඳහා රජය දැඩි ලෙස කැපවී සිටින බව අග්රාමාත්යතුමිය යළි අවධාරණය කළාය.
පාසල් දන්ත සෞඛ්ය සේවා සහ ප්රජා මූලික සෞඛ්ය වැඩසටහන් ඇතුළු සාර්ථක වැඩසටහන් තවදුරටත් ශක්තිමත් කරමින් ඉදිරියට ගෙන යන බව ද අග්රාමාත්යතුමිය මෙහිදී තවදුරටත් සඳහන් කළාය.
එමෙන්ම අග්රාමාත්යවරිය අවධාරණය කළේ නවීන තාක්ෂණය යොදා ගැනීම, දේශීය පර්යේෂණ හැකියාවන් ශක්තිමත් කිරීම සහ ජාත්යන්තර භාවිතයන් මෙරට අවශ්යතාවන්ට ගැළපෙන ලෙස යොදා ගනිමින් රටේ මහජන සෞඛ්ය පද්ධතිය තවදුරටත් ශක්තිමත් කිරීමට දායක වන ලෙසය.
දන්ත වෛද්ය වෘත්තිය තුළ ලැබෙන කාන්තා දායකත්වය අගය කළ අග්රාමාත්යතුමිය, විශේෂඥ පුහුණුව, පර්යේෂණ, නායකත්වය සහ තීරණ ගැනීමේ ක්ෂේත්රවල සමාන අවස්ථා ද සහතික විය යුතු බවද පැවසීය.
