ශ්රී ලංකාවේ අධිකරණ පද්ධතිය ඩිජිටල්කරණය කිරීමේ වැඩපිළිවෙලේ වැදගත් සන්ධිස්ථානයක් සනිටුහන් කරමින් සම්පූර්ණයෙන්ම කඩදාසි රහිත නීතිඥවරු දිවුරුම් දීමේ උත්සවයක් සාර්ථකව පැවැත්වීමට හැකි වූ බව ශ්රේෂ්ඨාධිකරණය විසින් නිවේදනය කර තිබේ.
ශ්රේෂ්ඨාධිකරණ ලේඛකාධිකාරී මනෝදී හේවාවසම් මහත්මිය විසින් නිකුත් කළ නිවේදනයක සඳහන් වන්නේ ඉකුත් දින පහක කාලය තුළ මෙම ක්රියාදාමය යටතේ නීතිඥවරු 735දෙනෙකු දිවුරුම් දීම සිදුවූ බවය.
මෙරට අධිකරණ කටයුතු ඩිජිටල්කරණය කිරීම සඳහා අගවිනිසුරු ප්රීති පද්මන් සූරසේන මහතාගේ ප්රධානත්වයෙන් වැඩපිළිවෙළක් ක්රියාත්මක වන අතර මෙම දිවුරුම් දීමේ උත්සවය ශ්රේෂ්ඨාධිකරණ පරිපාලනය නවීකරණය කිරීම සඳහා ගනු ලැබූ පුළුල් පියවරයන්හි කොටසක් වශයෙන් සඳහන් කළ හැකිය.
මෙම උත්සවයේ ප්රධාන අංගයක් වූයේ ඩිජිටල් අත්සන් සාර්ථකව ක්රියාත්මක කිරීම වන අතර, එමඟින් නීතිඥවරුන්ට අවශ්ය සියලුම ලියකියවිලි ඉලෙක්ට්රොනික ආරක්ෂිතව ක්රියාත්මක කිරීමට සහ සත්යාපනය කිරීමට හැකි වේ.
ඩිජිටල්කරණය කරනු ලැබූ මෙම දිවුරුම් දීමේ උත්සවය හේතුවෙන් කඩදාසි 15,000කට ආසන්න සංඛ්යාවක් ශ්රේෂ්ඨාධිකරණයට ඉතිරි කර ගැනීමට හැකි වී තිබෙන බවත් නිවේදනයේ සඳහන් වේ.
මෙම වැඩපිළිවෙල හරහා අධිකරණ පද්ධතියේ විනිවිද භාවය හා කාර්යක්ෂමතාවය ද ශක්තිමත් වන අතර කඩදාසි භාවිතයෙන් මතුවන පාරිසරික බලපෑම අවම කිරීම තුළින් පරිසර සංරක්ෂණයට ශ්රේෂ්ඨාධිකරණය දක්වන කැපවීම මනාව පැහැදිලි වන බවත් එම නිවේදනයේ පෙන්වා දී තිබේ.
මෙම වැඩපිළිවෙල ශක්තිමත් කරමින් ශ්රේෂ්ඨාධිකරණය මෙන්ම අභියාචනාධිකරණය ද මාර්ගගත ක්රමයට නඩු ගොනු කිරීමේ කටයුතු ආරම්භ කර ඇති අතර වාණිජ මහාධිකරණය ද ඉදිරි සතියේ විද්යුත් ක්රමවේදය යටතේ නඩු පැවරීමේ කටයුතු ආරම්භ කිරීමට නියමිත බවත් එම නිවේදනයේ වැඩිදුරටත් සඳහන්.
