චීන කොමියුනිස්ට් පක්ෂයේ 105 වන සංවත්සරය කොළඹදී ඊයේ (26) සමරනු ලැබීය.
ඒ සඳහා වූ විශේෂ සැමරුම් උත්සවය චීන මාධ්‍ය සමූහයේ සිංහල සේවය සහ ශ්‍රී ලංකාවේ කොමියුනිස්ට් පක්ෂය විසින් සංවිධානය කළ අතර එය එම පක්ෂ මූලස්ථානයේදී පැවැත්විණි.
මේ සඳහා පරිසර අමාත්‍ය වෛද්‍ය ධම්මික පටබැඳි, ශ්‍රී ලංකාවේ චීන තානාපති චී චෙනග් හොන්ග්, ශ්‍රී ලංකාවේ කොමියුනිස්ට් පක්ෂ මහ ලේකම් ජී. වීරසිංහ මෙන්ම සර්වජන බලයේ නායක පාර්ලිමේන්තු මන්ත්‍රී දිලිත් ජයවීර මහතා ඇතුළු පක්ෂ රැසක නියෝජිතයින් මෙන්ම රාජ්‍ය තාන්ත්‍රික නියෝජිතයින් රැසක් ද එක්විය.
මෙහිදී සංවත්සරය වෙනුවෙන් සුබ පැතුම් පණිවිඩයක් යොමු කළ අග්‍රාමාත්‍ය ආචාර්ය හරිනි අමරසූරිය සියවසකට අධික කාලයක් පුරා එම පක්ෂ ලබා දුන් සුවිශේෂී නායකත්වය තුළින් චීනයේ ජාතික සංවර්ධනය, සමාජීය ප්‍රගතිය මෙන්ම ජනතා සුබසාධනය උදෙසා අත්කරගෙන ඇති ජයග්‍රහණ විශිෂ්ට බවද සඳහන් කළාය.
එමෙන්ම චීන ජනතාවගේ ජීවන තත්ත්වය උසස් කිරීමට පමණක් නොව ගෝලීය ආර්ථික වර්ධනය තාක්ෂණික නවෝත්පාදනය සහ ජාත්‍යන්තර සහයෝගීතාව ප්‍රවර්ධනය කිරීම සඳහාද චීනය සුවිශේෂී දායකත්වයක් ලබා දී ඇති බවද අග්‍රාමාත්‍යවරියගේ සුබ පැතුම් පණිවිඩයේ සඳහන් විය.
මෙහිදී අදහස් දැක්වූ පරිසර අමාත්‍ය වෛද්‍ය ධම්මික පටබැඳි මහතා පැවසුවේ අන්‍යෝන්‍ය ගෞරවය, අවබෝධය සහ පොදු අරමුණක් මත සිදු කරන මග පෙන්වීමකින් විවිධත්වය ශක්තියේ මූලාශ්‍රයක් බවට පත්විය හැකි බවත් චීනයේ අත්දැකීම් මගින් එය පෙන්වා දෙන බවත්ය.
ශ්‍රී ලංකාවටද මෙය ආදර්ශයක් බවත් පැවසූ අමාත්‍යවරයා ජාතික එකමුතුව ශක්තිමත් කිරීම, ජාතික සහජීවනය සහ වාර්ගික සමගිය ප්‍රවර්ධනය කිරීම සඳහා රජය කැපවී සිටින බවද පැවසීය.
එමෙන්ම චීන තානාපතිවරයා මෙහිදී පැවසුවේ චීනය සහ ශ්‍රී ලංකාව සෑම විටම මිත්‍රශීලි සබඳතා පවත්වාගෙන ගොස් ඇති බවත් දෙරටේ තරුණ පරපුර එකිනෙකා හොඳින් දැන හඳුනා ගැනීම, ද්විපාර්ශ්වික සබඳතා වර්ධනය කිරීමට වැදගත් දායකත්වයක් සපයන බවත්ය.
