ලෝක කුසලාන පාපන්දු තරගාවලියේ මූලික වටයේ "C" කාණ්ඩයේ පැවැති තීරණාත්මක තරගයකින් හයිටි රාජ්‍යය පරදා ගෝල 4-2 ක විශිෂ්ට ජයක් ලැබීමට මොරොක්කෝව සමත් විය.

මෙම ජයග්‍රහණයත් සමඟ "C" කාණ්ඩයේ දෙවැනි ස්ථානය දිනාගනිමින් ලෝක කුසලාන තරගාවලියේ 32 දෙනාගේ වටයට සුදුසුකම් ලැබීමට මොරොක්කෝ කණ්ඩායම සමත් විය.

ප්‍රේක්ෂකයින් මහත් සේ පිනවූ මෙම තරගයේ පළමු අර්ධය තුළ දෙවතාවක්ම පෙරමුණ ගැනීමට හයිටි කණ්ඩායම සමත් වුවද, මොරොක්කෝ ක්‍රීඩකයින් ඉතා දක්ෂ ලෙස තරගයට නැවත අවතීර්ණ වෙමින් ලකුණු තත්ත්වය සම තත්ත්වයට පත් කරගන්නා ලදී.

තරගයේ පළමු ගෝලය හයිටි ක්‍රීඩක ලෙනී ජෝසෆ් විසින් එල්ල කළ ප්‍රහාරයක් මොරොක්කෝ ගෝල රකින ක්‍රීඩක යසින් බෝනූගේ ඇඟේ වැදී ගෝල සීමාව තුළට ඇතුළු වීම නිසා එය හයිටි පිලට වාසි සහගත ස්වයං ගෝලයක් ලෙස සටහන් විය.

කෙසේ වෙතත්, මොරොක්කෝවේ අෂ්රෆ් හකිමි විසින් එල්ල කළ ගෝලයෙන් තරගය 1-1 ක් ලෙස සම විය.

ඉන් අනතුරුව හයිටි ක්‍රීඩක විල්සන් ඉසිඩෝර් දක්ෂ ගෝලයක් ලබාගනිමින් නැවතත් හයිටි පිල පෙරමුණට රැගෙන ගියද, පළමු අර්ධය නිමා වීමට මොහොතකට පෙර ඉස්මායෙල් සයිබාරි මොරොක්කෝව වෙනුවෙන් ගෝලයක් ලබාගනිමින් ලකුණු තත්ත්වය 2-2 ක් ලෙස සම කළේය.

තරගය අවසන් වීමට මිනිත්තු 12ක් තිබියදී මොරොක්කෝ කණ්ඩායමට හිමිවූ 'කෝනර්' (Corner) අවස්ථාවක් සාර්ථක කරගත් සුෆියාන් රහීමි මොරොක්කෝවට 3-2 ක පෙරමුණක් ලබා දුන්නේය.

ඉන්පසු තරගයේ අවසන් භාගයේදී යසින් ගෙසීම් සිවුවැනි ගෝලයත් වාර්තා කරමින් මොරොක්කෝවේ ජයග්‍රහණය තහවුරු කළේය. තරගාවලියෙන් ඉවතට විසිවී සිටි හයිටි රාජ්‍යය සිය පළමු ලෝක කුසලාන ප්‍රසාද ලකුණ ලබාගැනීමට ආසන්නයටම පැමිණියද අවසන් මොහොතේදී එය අහිමි විය.

මේ අතර ඊයේ "C" කාණ්ඩයේ යටතේ ස්කොට්ලන්තය සහ බ්‍රසීල කණ්ඩායම අතර පැවති තරගයෙන් ස්කොට්ලන්තය පරදා ගෝල 3-0 ක පහසු ජයක් ලැබීමට බ්‍රසීල කණ්ඩායම සමත් විය.

මෙම ජයග්‍රහණයත් සමඟ "C" කාණ්ඩයේ ප්‍රථම ස්ථානය දිනාගනිමින් ලෝක කුසලාන තරගාවලියේ 32 දෙනාගේ වටයට සුදුසුකම් ලැබීමට බ්‍රසීලය සමත් වූ අතර, ස්කොට්ලන්ත කණ්ඩායම පළමු වටයෙන්ම ඉවතට විසිවීමේ දැඩි අවදානමකට මුහුණ පා සිටී.

මියාමි නුවර පැවැති මෙම තරගයේදී, සුපිරි තරුවක් වන විනිසියස් ජූනියර් ස්කොට්ලන්ත පසුපෙළ ආරක්ෂකයින් අතින් සිදු වූ බරපතළ වැරැද්දකින් ප්‍රයෝජන ගනිමින් තරගයේ මුල් භාගයේදීම බ්‍රසීලයට පළමු ගෝලය ලබා දුන්නේය.

පසුව පළමු අර්ධයේ අතිරේක කාලය තුළ හිසින් එල්ල කළ ප්‍රහාරයකින් ඔහු සිය දෙවැනි ගෝලය ද වාර්තා කළේය. මේ වන විට ඔහු මෙම තරගාවලියේ තරග 3කදී ගෝල 4ක් ලබාගෙන තිබේ.

තරගය පුරා කිසිදු අවස්ථාවක ස්කොට්ලන්තයට සාර්ථක වීමට බ්‍රසීල ආරක්ෂක පෙළ ඉඩ නොදුන් අතර, තරගයේ 60 වැනි මිනිත්තුවේදී මැතියුස් කුන්හා බ්‍රසීලය වෙනුවෙන් තෙවැනි ගෝලය වාර්තා කළේය.

පස් වතාවක් ලෝක ශූරයන් වූ බ්‍රසීල කණ්ඩායම තරගය අවසාන වීමට ආසන්නයේදී සිය සුපිරි ක්‍රීඩක නේමාර් ද පිටියට කැඳවූ අතර, එය ඔහු වසර දෙකහමාරකට පසු ජාත්‍යන්තර තරගයකට ක්‍රීඩා කළ පළමු අවස්ථාව විය.

කාර්ලෝ අන්සෙලොට්ටි යටතේ ක්‍රීඩා කරන බ්‍රසීල කණ්ඩායම මෙවර ලෝක කුසලානය දිනාගැනීමට තරම් ප්‍රබලද යන්න පිළිබඳව විචාරකයින් අතර සැක මතු වුවද, කාණ්ඩයේ පෙරමුණ ගනිමින් ඔවුන් ජූනි 29 වෙනිදා හූස්ටන් නුවරදී 32 දෙනාගේ වටයේ තරගයට මුහුණ දීමට ටෙක්සාස් බලා පිටත්ව යනු ඇත.

එහිදී ඔවුන්ට මුහුණ දීමට සිදුවන්නේ "F" කාණ්ඩයේ දෙවැනි ස්ථානය ගන්නා නෙදර්ලන්තය, ජපානය හෝ ස්වීඩනය යන කණ්ඩායමකටයි.

මොරොක්කෝව සමඟ පැවැති තරගයේදී සහ හයිටි රාජ්‍යය සමඟ පැවැති තරගයේදී ගෝල වාර්තා කළ විනිසියස් ජූනියර්, 2002 වසරේදී රොනාල්ඩෝ සහ රිවල්ඩෝ තැබූ වාර්තාවකට පසු, ලෝක කුසලානයක මූලික වටයේ සියලුම තරගවලදී ගෝල රැස් කළ පළමු බ්‍රසීල ක්‍රීඩකයා බවට පත්විය. ඔහු දැනට ගෝල 4ක් ලබාගෙන රන් සපත්තුව සඳහා වන තරගයේ අර්ලින් හාල්න්ඩ් සහ කිලියන් එම්බාපේ සමඟ සම තත්ත්වයේ පසුවන අතර, ලියොනල් මෙසීට වඩා එක් ගෝලයක් පසුපසින් සිටී.

මේ අතර, ස්කොට්ලන්තය සිය පාපන්දු ඉතිහාසයේ සහභාගී වූ සෑම ප්‍රධාන තරගාවලියකදීම (මීට පෙර ලෝක කුසලාන 8ක් ඇතුළුව) මූලික වටයෙන්ම ඉවතට විසිවීමේ අමිහිරි ඉරණමට මෙවරත් මුහුණ දීමේ අවදානමක් ඇත.

"C" කාණ්ඩයේ ප්‍රසාද ලකුණු සටහනට අනුව බ්‍රසීලය ප්‍රථම ස්ථානය ගත් අතර, මොරොක්කෝව ද ප්‍රසාද ලකුණු 7ක් ලබා ගත්තද ගෝල පරතරය මත දෙවැනි ස්ථානයට පත්විය.

ඒ අනුව 32 දෙනාගේ වටය යටතේ මොරොක්කෝ කණ්ඩායම ලබන සඳුදා හූස්ටන් නුවරදී "F" කාණ්ඩයේ ප්‍රථම ස්ථානය දිනාගන්නා කණ්ඩායම සමඟ තරග වැදීමට නියමිතය.

ස්කොට්ලන්තය ප්‍රසාද ලකුණු 3ක් ලබා ගනිමින් තෙවැනි ස්ථානයේ පසුවන අතර, 32 දෙනාගේ වටයට තේරී පත්වන හොඳම තෙවැනි ස්ථාන 8 අතරට තේරීමට නම් ඔවුන්ට අනෙක් කාණ්ඩවල ප්‍රතිඵල එනතෙක් බලා සිටීමට සිදුවේ.