යාපනය, චෙම්මනි සිත්තුපාත්තු සුසාන භූමිය ආසන්නයෙන් හමුවූ සමූහ මිනිවළ, මෑත ඉතිහාසයේ උතුරු පළාතෙන් වාර්තා වූ විශාලම සමූහ මිනිවළ බව පැවසේ.

ඊයේ (15) දින සිදුකළ කැනීම්වලදී තවත් මිනිස් සිරුරු 10කට අදාළ අස්ථි කොටස් ගොඩගැනීමත් සමඟ, මෙම මිනිවළෙන් මේ දක්වා මතුකරගෙන ඇති සමස්ත මිනිස් සිරුරු සංඛ්‍යාව 351ක් දක්වා ඉහළ ගොස් ඇත.

මීට පෙර උතුරු පළාතේ විශාලම සමූහ මිනිවළ ලෙස සැලකුණේ මිනිස් සිරුරු 342ක අස්ථි කොටස් හමුවූ මන්නාරම පැරණි සතොස ගොඩනැඟිල්ල පැවති ස්ථානයේ මිනිවළ බව සඳහන් වේ.

අතුරුදහන්වූවන්ගේ ඥාතීන් වෙනුවෙන් පෙනී සිටින නීතිඥ වි.කේ. නිරංජන් මහතා ප්‍රකාශ කළේ, ඊයේ දිනෙන් අවසන් වූ චෙම්මනි සමූහ මිනිවළේ 6 වැනි අදියරේ 25 වැනි දිනය වන විට සිරුරු 360කට අදාළ අස්ථි කොටස් හඳුනාගෙන ඇති අතර ඉන් සිරුරු 351ක කොටස් මේ වන විට ගොඩගෙන ඇති බවය.

යාපනය මහෙස්ත්‍රාත් එස්. ලෙනින්කුමාර් මහතාගේ ඍජු අධීක්ෂණය යටතේ, කැලණිය විශ්වවිද්‍යාලයේ පුරාවිද්‍යාව පිළිබඳ ජ්‍යෙෂ්ඨ මහාචාර්ය රාජ් සෝමදේව මහතා සහ යාපනය විශ්වවිද්‍යාලයේ අධිකරණ වෛද්‍ය විද්‍යාව පිළිබඳ විශේෂඥ වෛද්‍ය සෙල්ලයියා පිරනවන් මහතා ඇතුළු විශේෂඥ කණ්ඩායමක් විසින් මෙම කැනීම් කටයුතු සිදුකරනු ලබයි.

2026 අප්‍රේල් 27 වෙනිදා මේ දක්වා වන 6 වැනි අදියර තුළින් පමණක් මිනිස් සිරුරු 112ක කොටස් ගොඩගෙන ඇත.

කුඩා දරුවන්ගේ බවට සැකකෙරෙන අස්ථි කොටස් කිහිපයක්, රන් භාණ්ඩයක කොටසක් සහ කාසි කිහිපයක් ද හමුව ඇති බව අද දෙරණ වාර්තාකරු පවසයි.

මීට පෙර 2025 සැප්තැම්බර් 06 වෙනිදා මෙහි 5 වැනි අදියර නිමාවට පත්වන විට සිරුරු 239ක කොටස් ගොඩගෙන තිබිණි.

දැනට හමුවී ඇති සියලුම අස්ථි කොටස් සහ භාණ්ඩ යාපනය මහෙස්ත්‍රාත් අධිකරණ නියෝග මත යාපනය විශ්වවිද්‍යාලයේ අධිකරණ වෛද්‍ය විද්‍යා පීඨයේ විශේෂඥ වෛද්‍ය සෙල්ලයියා පිරනවන් මහතා භාරයේ සුරක්ෂිතව තබා ඇත.

යුද සමයෙන් අනතුරුව උතුරු පළාතේ ස්ථාන කිහිපයකින්ම මෙලෙස සමූහ මිනිවළවල් වාර්තා විය.

2013 වසරේ දී මන්නාරම තිරුකේදීශ්වරන් ප්‍රදේශයේන් මිනිස් සිරුරු 88කට ආසන්න ප්‍රමාණයක කොටස් හමුව ඇත.

මන්නාරම පැරණි සතොස පිහිටි ස්තානයේ 2018 - 2019 වසරේදී මිනිස් සිරුරු 342ක කොටස් හමුවූ අතර, අමෙරිකානු රසායනාගාරයක සිදුකළ කාබන් පරීක්ෂාවකින් හෙළි වූයේ ඒවා වර්ෂ 1450 ත් 1650 ත් අතර අතීතයකට අයත් බවය.

මුලතිව් කොක්කුතුඩුවායි ප්‍රදේශයේ 2023-2024 වසර සීමාවේ දී මිනිස් සිරුරු 52ක කොටස් මතුකරගත් අතර, ඒවා 1994 - 1996 කාල වකවානුවට අයත් විය හැකි බව නිලධාරීන් නිගමනය කළහ.

කොක්කුතුඩුවායි කැනීම්වලින් අනතුරුව වාර්තා වූ මෙම චෙම්මනි සමූහ මිනිවළේ කැනීම් කටයුතු තවදුරටත් ක්‍රියාත්මකය.