ත්‍රස්තවාදය වැළැක්වීමේ පනත යටතේ රඳවාගෙන සිටින රාජ්‍ය බුද්ධි සේවයේ හිටපු අධ්‍යක්ෂ සූරේෂ් සලේ මහතාගේ සෞඛ්‍ය තත්ත්වය පිළිබඳව කඩිනමින් අවධානය යොමු කරන ලෙස ඉල්ලමින් සර්වජන බලය විසින් ජනාධිපති අනුර කුමාර දිසානායක මහතා වෙත ලිපියක් යොමු කර තිබේ.
සුරේෂ් සලේ මහතාගේ සෞඛ්‍ය තත්ත්වයේ පිරිහීම සම්බන්ධයෙන් සර්වජන බලය දැඩි කනස්සල්ලට පත්ව සිටින බවද අදාළ ලිපිය මඟින් අවධාරණය කර ඇත.
රටේ ස්වෛරීභාවය සහ භෞමික අඛණ්ඩතාව ආරක්ෂා කිරීම උදෙසා එඩිතර රණවිරුවෙකු ලෙස එතුමා ඉටුකළ සුවිශේෂී සේවය අතිශයින් අගය කරන අතර, ජාතිය වෙනුවෙන් එතුමා කළ කැපවීම සහ දායකත්වය කිසිසේත් අමතක කළ නොහැකි බවද අවධාරණය කර ඇති සර්වජන බලය එවැනි රණවිරුවෙකුට වත්මන් තත්ත්වය තුළ හිමිවිය යුතු ගෞරවය සහ රැකවරණය ලැබිය යුතු තම පක්ෂයේ විශ්වාසය වන බවද ලිපියේ තවදුරටත් දැක්වේ.
එබැවින්, මානුෂීය පදනමින් සහ නීතියේ ආධිපත්‍යය සුරැකීමේ අරමුණින්, මෙම කරැණ පිළිබඳ කඩිනම් අවධානය යොමු කර නිසි කටයුතු අප්‍රමාදීව සලස්වන මෙන් සර්වජන බලය ජනාධිපති අනුර කුමාර දිසානායක මහතාගේ ඉල්ලා සිටී.
- උපුටාගැනීම -
අපට ලැබී ඇති තොරතුරු අනුව, ඒ මහතාගේ සෞඛ්‍ය තත්ත්වය දිනෙන් දින සීග්‍රයෙන් පිරිහෙන බව පෙනී යයි. මෙම තත්ත්වය සැලකිල්ලට ගෙන, ඒ මහතා සහ පවුලේ සාමාජිකයන් විසින් කරන ලද ඉල්ලීම් කඩිනමින් ඉටු කිරීම, ඒ මහතා රඳවා තබා ගැනීමේ නියෝගය නිකුත් කළ පාර්ශවය ලෙස ඔබතුමා සතු සෘජු වගකීමක් ලෙස අපි දකිමු.
රැඳවුම් භාරයේ සිටින පුද්ගලයෙකුගේ මූලික මානව අයිතිවාසිකම් සහ සෞඛ්‍ය ආරක්ෂාව තහවුරු කිරීම රජයක මූලික වගකීමකි.
සුරේෂ් සලේ මහතාගේ සෞඛ්‍ය තත්ත්වය සම්බන්ධයෙන් යම් අවාසනාවන්ත තත්ත්වයක් උද්ගත වුවහොත්, එය දේශීය වශයෙන් පමණක් නොව, ජාත්‍යන්තර වශයෙන්ද ශ්‍රී ලංකාවේ ප්‍රතිරූපයට සහ මානව හිමිකම් ආරක්ෂා කිරීම සම්බන්ධයෙන් රටට ඇති විශ්වසනීයත්වයට විශාල හානියක් බව අපගේ ස්ථාවරයයි. එමෙන්ම, රඳවා තබා ගැනීමේ නියෝගය නිකුත් කළ අධිකාරිය ලෙස එහි ඝෘජු වගකීම ඔබතුමා මත පැටවෙනු ඇත.
- උපුටාගැනීම අවසන් -
ජනාධිපතිවරයා වෙත යොමුකළ සම්පූර්ණ ලිපිය පහතින් දැක්වේ.
අතිගරු ජනාධිපති අනුර කුමාර දිසානායක මැතිතුමා_14 June 2026 by poornima
