2026 වසරේ ගතවූ කාලය තුළ ඉන්ධන පරිභෝජනය සහ ඉන්ධන ආනයන වියදම් සම්බන්ධව කැබිනට් ප්‍රකාශක අමාත්‍ය නලින්ද ජයතිස්ස මහතා අද (02) අනාවරණයක් සිදු කළේය.

ඔහු සඳහන් කළේ, 2026 වසරේ මුල් මාස පහ තුළ ඉන්ධන පරිභෝජනය සාපේක්ෂව අඩු මට්ටමක පැවතියද, ලෝක වෙළෙඳපොළේ තෙල් මිල ඉහළ යාම හේතුවෙන් ඉන්ධන ආනයන වියදම සැලකිය යුතු ලෙස ඉහළ ගොස් ඇති බවය.

අද (02) පැවති කැබිනට් මාධ්‍ය හමුවේදී අදහස් දක්වමින් අමාත්‍යවරයා සඳහන් කළේ, ජනවාරි මාසයේදී ඉන්ධන ආනයනය සඳහා අමෙරිකානු ඩොලර් මිලියන 186ක් වැය වූ අතර, මැයි මාසය වන විට එය ඩොලර් මිලියන 521 දක්වා ඉහළ ගොස් ඇති බවයි.

එහිදී වැඩිදුරටත් අදහස් දැක්වූ අමාත්‍ය නලින්ද ජයතිස්ස මහතා,

"අපේ පරිභෝජනය ගත්තොත් ජනවාරි මාසයේදී අපි ඕටෝ ඩීසල් කිලෝ ලීටර් 4,538ක්, පෙබරවාරි 4,846, මාර්තු 6,130, අප්‍රේල් 3,988, මැයි 3,701යි ඒ අනුව ජනවාරි මාසයේ සිට මැයි මාසය දක්වා වන විට අපේ පරිභෝජනය තිබෙන්නේ 82%ක මට්ටමක.

සමස්ත ඩීසල් ප්‍රමාණය ජනවාරි මාසයේදී කිලෝ ලීටර් 5,944ක් මැයි මාසයේදී කිලෝ ලීටර් 5,394 පාවිච්චි වෙනවා ඒ අනුව 91%ක තමයි අපේ පාවිච්චි වෙලා තියෙනවා.

පෙට්‍රල් 92 ජනවාරි මාසයේදී කිලෝ ලීටර් 5,565ක් පාවිච්චි වෙලා තිබෙනවා මැයි මාසයේ මේ වන විට 4,849ක් පාවිච්චි වෙලා තියෙනවා. ඒ අනුව 87%ක ප්‍රමාණයක් පාවිච්චි වෙලා තියෙනවා.

නමුත් ලෝක වෙළෙඳපොළේ තෙල් මිල වැඩිවීමත් එක්ක අපට මාසයකට තෙල් ආනයනය කරන්න තිබෙන වියදම ඉහළ ගිහින් තියෙනවා. ජනවාරි මාසයේදී ඩොලර් මිලියන 186, පෙබරවාරි මාසයේදී ඩොලර් මිලියන 97, මාර්තු ඩොලර් මිලියන 95, අප්‍රේල් මාසයේදී ඩොලර් මිලියන 316, මැයි මාසයේදී ඩොලර් මිලියන 521යි ජනවාරි මාසයේ ඉඳලා මැයි මාසය වෙනකොට පරිභෝජනය 80%-90% අතරේ තිබුණාට වැඩිවීම ඩොලර් මිලියන 186 ඉඳලා 521 දක්වා ඉහළ ගිහින් තියෙනවා. ලෝක වෙළෙඳපොළේ අඩුවැඩි වීම් අනුව අපි මිල ගලප්පන්න තමයි උත්සාහ කරමින් යන්නේ."