ඉන්දීය අග්‍රාමාත්‍ය නරේන්ද්‍ර මෝදි එරට ජනතාවගෙන් ප්‍රධාන ඉල්ලීම් කිහිපයක් සිදුකර ඇති බව ඉන්දීය මාධ්‍ය වාර්තා සඳහන් කරයි.
ප්‍රධාන වශයෙන් මැදපෙරදිග ඇති වී තිබෙන යුදමය තත්ත්වය හේතුවෙන් ඇති විය හැකි ආර්ථික බලපෑම්වලින් රට ආරක්ෂා කර ගැනීමට ඉන්දියානු ජනතාවගෙන් අග්‍රාමාත්‍ය නරේන්ද්‍ර මෝදී මෙම ඉල්ලීම් සිදුකර ඇත.
එහිදී,
*ඉන්ධන සහ පොහොර භාවිතය අඩු කිරීම.
* විදේශ සංචාර සීමා කිරීම.
* නිවසේ සිට වැඩකිරීම
*රන් මිලදී ගැනීම සීමා කිරීම යන මුලික කාරණා කෙරෙහි අවධානය යොමු කර තිබේ.
ඒ අනුව පෙට්‍රල්, ඩීසල් සහ පොහොර සඳහා වැයකරන මුදල් සීමාකරන ලෙස ද මෝදී ඉන්දියානුවන්ගෙන් ඉල්ලා තිබේ.
එමෙන්ම රටින් පිටතට මුදල් ගලායාම වැළැක්වීම සඳහා විදේශ සංචාර අඩුකරන ලෙසත්, විදේශයන්හි පවත්වන මංගල උත්සව නතර කර ඒ වෙනුවෙන් රට තුළම සංචාරයන්හි නිරත වෙන ලෙසත් නරේන්ද්‍ර මෝදි සිය ජනතාවගෙන් ඉල්ලීමක් කර ඇත.
අත්‍යාවශ්‍ය නොවන ගමන් බිමන් සීමා කර ඉන්ධන පිරිමැස්මෙන් යුතුව භාවිත කරන ලෙසත්, පෙට්‍රල් සහ ඩීසල් භාවිතය අඩුකිරීමට දුම්රිය, විදුලි වාහන හෝ පොදු ප්‍රවාහනය භාවිත කරන ලෙසත් දැනුම්දුන් බව විදෙස් මාධ්‍ය වාර්තා කරයි.
මේ අතර, ඩීසල් භාවිතය වෙනුවට සූර්ය බලශක්තියට යොමු වෙන ලෙසත්, සූර්ය බලයෙන් ක්‍රියාකරන ජල පෝම්ප යන ආදිය භාවිත කරන ලෙසටත් මෝදි උපදෙස් ලබාදී ඇත.
එමෙන්ම හැකි සෑම අවස්ථාවකදීම නිවසේ සිට වැඩකිරීමට යොමුවෙන ලෙසත් අග්‍රාමාත්‍ය නරේන්ද්‍ර මෝදි ඉන්දියානුවන්ගෙන් ඉල්ලා සිටී.
විදෙස් විනිමය ඉතිරි කරගැනීම සඳහා වසරක් යන තුරු රත්‍රං මිලදී ගැනීම සීමා කරන ලෙසත් අත්‍යාවශ්‍ය නොවන රන් ආභරණ මිලදී ගැනීමෙන් වළකින ලෙසත් මෝදී ජනතාවගෙන් ඉල්ලා තිබේ.
මැදපෙරදිග යුද තත්ත්වය හේතුවෙන් දිනෙන් දින ඉහළ යන තෙල් මිල සමඟ රටේ ආර්ථිකය ශක්තිමත් කිරීම වෙනුවෙන් මෙම පියවරයන්ට යොමුවෙන ලෙස මෝදී පවසා තිබේ.
තවද ඉන්දියානු රුපියල ශක්තිමත් කිරීම මෙන්ම ආනයන වියදම් අඩුකිරීම තුළින් රුපියලේ අගය පහත වැටීම පාලනය කිරීම මෙම පියවරයන්ගේ මුලික අරමුණ බවද ඉන්දීය අගමැති නරේන්ද්‍ර මෝදි සඳහන් කර තිබේ.
