ඉන්දියාවේ ජාතික අපරාධ වාර්තා කාර්යාංශය (NCRB) විසින් නිකුත් කරන ලද නවතම දත්තවලට අනුව, 2024 වසරේදී ඉන්දියාවේ ශිෂ්‍ය සියදිවි නසාගැනීම් සංඛ්‍යාව 14,488 දක්වා ඉහළ ගොස් වාර්තාගත මට්ටමකට පැමිණ ඇති බව ඉන්දීය මාධ්‍ය වාර්තා පවසයි.

මෙය 2023 වසරේ පැවති 13,892ක සංඛ්‍යාවට සාපේක්ෂව 4.3% ක කැපී පෙනෙන වර්ධනයක් බව සඳහන් වේ.

එම කාලය තුළ ඉන්දියාවේ සමස්ත සියදිවි නසාගැනීම් සංඛ්‍යාව 171,418 සිට 170,746 දක්වා 0.4% ක සුළු අඩුවීමක් පෙන්නුම් කළද, ශිෂ්‍ය මරණ ප්‍රමාණය පමණක් මෙලෙස ඉහළ ගොස් ඇති බව වාර්තා කරයි.

NCRB වාර්තාව පෙන්වා දෙන්නේ පසුගිය වසර 10 ක කාලය තුළ ඉන්දියාවේ සමස්ත සියදිවි නසාගැනීම් 27.8% කින් වැඩි වී ඇති අතර, ශිෂ්‍ය සියදිවි නසාගැනීම් පමණක් 62.2% කින් (8,934 සිට 14,488 දක්වා) අතිශය වේගයෙන් වර්ධනය වී ඇති බවය.

2015 සහ 2024 අතර කාලය තුළ පමණක් ඉන්දියාවේ සිසුන් 115,850 දෙනෙකු සියදිවි නසාගෙන ඇත.

විශේෂඥයන් පෙන්වා දෙන්නේ මෙම තත්ත්වය මගින් ඉන්දියාවේ ශිෂ්‍ය ප්‍රජාව අතර පවතින බරපතළ මානසික සෞඛ්‍ය අර්බුදය නිරූපණය වන බවය.

*මෙයට බලපාන ප්‍රධාන සාධක කිහිපයක් පෙන්වා දී තිබේ.

*අධ්‍යාපනික පීඩනය, විභාග සහ දැඩි තරඟකාරීත්වය.

*මවුපියන් දරුවන්ගෙන් බලාපොරොත්තු වන ඉහළ ප්‍රතිඵල.

*තරුණ පරපුර අතර ඇති වන මානසික පීඩනය.

*විශාදය (Depression), කාංසාව (Anxiety) සහ බයිපෝලර් (Bipolar) වැනි රෝගී තත්ත්වයන් නිසි වේලාවට හඳුනා නොගැනීම.

දිල්ලියේ මානව හැසිරීම් සහ ආශ්‍රිත විද්‍යා ආයතනයේ (IHBAS) මනෝචිකිත්සක මහාචාර්ය වෛද්‍ය ඕම් ප්‍රකාෂ් පවසන්නේ බොහෝ සිසුන් මිය යන්නේ ප්‍රතිකාර නොකළ මානසික පීඩාවන් නිසා බවය.

"අපි නිතරම විභාග පීඩනය ගැන කතා කරනවා, නමුත් බොහෝ විට මේ දරුවන් කාලයක් තිස්සේ විශාදය වැනි රෝගී තත්ත්වයන්ගෙන් පීඩා විඳින බව කවුරුවත් හඳුනා ගන්නේ නැහැ. අධ්‍යාපන ආයතන තුළ උපදේශන සේවාවන් සහ ශක්තිමත් මානසික සෞඛ්‍ය පද්ධතියක් අපට වහාම අවශ්‍යයි," ඔහු පවසයි.