සමාජවාදී වියට්නාම් ජනරජයේ ජනාධිපති ටෝ ලාම් හෙට (08) මෙරට පාර්ලිමේන්තුව ආමන්ත්රණය කරමින් විශේෂ කතාවක් සිදු කිරීමට නියමිතව තිබේ.
පෙරවරු 11.05ට පාර්ලිමේන්තුවට පැමිණෙන ජනාධිපතිවරයාව පිළිගනු ලබන්නේ, කථානායක වෛද්ය ජගත් වික්රමරත්න මහතා සහ පාර්ලිමේන්තුවේ මහලේකම් කුෂානි රෝහණදීර මහත්මිය විසිනි.
ඉන් අනතුරුව වියට්නාම් ජනාධිපතිවරයා සහ කථානායකවරයා අතර කෙටි හමුවක් පැවැත්වීමට සැලසුම් කර ඇති බව පාර්ලිමේන්තු සන්නිවේදන දෙපාර්තමේන්තුව සඳහන් කරයි.
මේ අවස්ථාව සඳහා ශ්රී ලංකා - වියට්නාම් මිත්රත්ව සංගමයේ සභාපති අමාත්ය දම්මික පටබැඳි සහ පාර්ලිමේන්තුවේ මහලේකම්වරිය සහභාගි වනු ඇත.
මෙහිදී වියට්නාම් ජනාධිපතිවරයා පාර්ලිමේන්තුවේ අමුත්තන් සඳහා වන විශේෂ පුස්තකයෙහි සිය සටහන තැබීමට ද නියමිතය.
අනතුරුව සභාගර්භයට පිවිසෙන වියට්නාම් ජනාධිපතිවරයා කථානායකවරයාගේ ආසනය සමීපයේ පනවා ඇති විශේෂ ආසනයේ අසුන්ගෙන පෙරවරු 11.40ට පාර්ලිමේන්තුව ආමන්ත්රණය කරමින් සිය විශේෂ කතාව සිදු කරනු ලබයි.
ඒ අනුව 2015 වසරෙන් පසු රාජ්ය නායකයෙකු ශ්රී ලංකා පාර්ලිමේන්තුව ආමන්ත්රණය කරන පළමු අවස්ථාව ලෙස මෙය සැළකෙන බව පාර්ලිමේන්තු සන්නිවේදන දෙපාර්තමේන්තුව සඳහන් කළේය.
වියට්නාම් ජනාධිපතිවරයාගේ කතාවෙන් අනතුරුව අග්රාමාත්යවරිය සහ විපක්ෂ නායකවරයා සිය ප්රකාශයන් ඉදිරිපත් කිරීමට නියමිතය.
අනතුරුව සභාව තාවකාලිකව අත්හිටුවීමෙන් පසු වියට්නාම් ජනාධිපතිවරයා පාර්ලිමේන්තු සංකීර්ණයෙන් නික්ම යනු ඇති බව පාර්ලිමේන්තු සන්නිවේදන දෙපාර්තමේන්තුව නිකුත් කළ නිවේදනයේ වැඩිදුරටත් දැක්වේ.
