මහා පරිමාණ මත්ද්රව්ය ජාවාරම්කරුවෙකු වන සළිඳු මල්සිත ගුණරත්න නොහොත් පානදුර කුඩු සළිඳු නැමැත්තාගේ සමීපතමයෙකු වන ඩුබායි අසිත නැමැත්තාගේ මත්ද්රව්ය ජාලයෙන් ඉපයූ බව කියන රුපියල් කෝටි හතරකට අධික දේපොළ මධ්යඹ අපරාධ විමර්ශන කාර්යාංශයේ නීති විරෝධී වත්කම් විමර්ශන කොට්ඨාසය විසින් අද (05) තහනම් කර තිබේ.
අපරාධ දිසාව භාර නියෝජ්ය පොලිස්පති චන්දන කොඩිතුවක්කු යන මහත්වරුන්ගේ උපදෙස් පරිදි මධ්යම අපරාධ විමර්ශන කාර්යාංශයේ අධ්යක්ෂ ජ්යෙෂ්ඨ පොලිස් අධිකාරි කමල් ආරියවංශ මහතාගේ සහ එහි පාලන හා විමර්ශන භාර සහකාර පොලිස් අධිකාරි බී.එම්.ටී. බස්නායක මහතාගේ උපදෙස් පරිදි නීති විරෝධී වත්කම් විමර්ශන අංශයේ නිලධාරීන් විසින් මෙම දේපොළ තහනම් කරනු ලැබීය.
මෙලෙස තහනම් කර ඇත්තේ පානදුර, මාදුපිටිය ප්රදේශයේ ඉදිකරමින් පවතින රුපියල් කෝටි දෙකහමාරකට අධික වටිනාකමකින් යුත් දෙමහල් නිවසක්, පානදුර සින්තවත්ත ප්රදේශයේ රුපියල් ලක්ෂ 70ක් පමණ වටිනාකමකින් යුත් ඉදිකරමින් පවතින නිවසක් සහිත ඉඩමක් සහ පානදුර අළුබෝමුල්ල බටහිර රවුම්කඩේ ප්රදේශයේ පිහිටි රුපියල් කෝටියකට ආසන්න වටිනාකමකින් යුත් පර්චස් 10.7ක ඉඩමකි.
පානදුර මාදුපිටිය ප්රදේශයේ දෙමහල් නිවසේ පසුගිය මාර්තු 13 වැනි දින පානදුර මහේස්ත්රාත් අධිකරණයෙන් ලබාගත් සෝදිසි වරෙන්තුවක් මත සිදුකළ වැටලීමකදි නීති විරෝධි ලෙස උපයාගත් රන් පවුම් 13 සහ රුපියල් ලක්ෂ 10කට ආසන්න මුදලක්ද තහනම් කෙරිණි.
එහිදී සිදුකළ වැඩිදුර විමර්ශනවලදී අනාවරණය වූ තොරතුරු මත මෙකී දේපොළ පිළිබඳව අනාවරණය වූ අතර ඒ අනුව නීති විරෝධී වත්කම් විමර්ශන කොට්ඨාසය විසින් මෙම දේපළ තහනම් කිරීමට පියවර ගෙන තිබේ.
