රජය විසින් වැඩි මිලට පොහොර මිලදී ගෙන ඇති බව ජාතික ගොවිජන එකමුතුවේ නියෝජිතයෙකු විසින් සිදු කළ ප්‍රකාශය සම්බන්ධයෙන් ජාතික පොහොර ලේකම් කාර්යාලය පැහැදිලි කිරීමක් සිදු කර තිබේ.
නිවේදනයක් නිකුත් කරමින් එම කාර්යාලය අවධාරණය කරන්නේ, අදාළ ප්‍රකාශයේ ඇතැම් කරුණු සත්‍ය නොවන බවය.
කසකස්තානයෙන් අඩු මිලට පොහොර ලබාගත හැකිව තිබියදී අමෙරිකානු ඩොලර් 800කට පොහොර ආනයනය කර ඇති බව අදාළ නියෝජිතයා විසින් පෙන්වා දෙනු ලැබීය.
එරටින් යුරියා පොහොර මෙට්‍රික් ටොන් එකක් අමෙරිකානු ඩොලර් 220ත් 320ත් අතර ප්‍රමාණයකට මිලදී ගැනීමේ හැකියාවක් පවතියි.
මෙවන් පසුබිමක ඩොලර් 800ක් වැනි වැඩි මිලකට පොහොර ආනයනය කිරීම සඳහා සමාගම්වලට රජය අවසර ලබාදී ඇති බව ඔහු හෙළි කළේය.
මේ සම්බන්ධයෙන් අවධානය කරන ජාතික පොහොර ලේකම් කාර්යාලය අනාවරණ කළේ, එරටින් යුරියා පොහොර ආනයනය සඳහා සිදු කළ ඉල්ලීම්වලට තමන් අප්‍රමාදව අනුමැතීන් ලබාදී ඇති බවය.
මේ දක්වා එම ආයතන කසකස්තානයෙන් යුරියා පොහොර ආනයනය කර නොමැති බව ද එම කාර්යාලය පෙන්වා දෙයි.
එමෙන්ම අප්‍රේල් මස 29 වෙනිදා Ceylon Trading and Plantation (Pvt) Ltd නමැති ආයතනයක් යුරියා මෙට්‍රික් ටොන් 25,000ක් ඇණවුමක් ලබාගෙන තිබේ.
කෙසේ වෙතත් මේ වන තෙක් එම ආයතනය ද යුරියා පොහොර ආනයනය කර නොමැති බව ද ජාතික පොහොර ලේකම් කාර්යාලය පෙන්වා දෙයි.
මේ අතර පසුගිය මාසයේදී ඉන්දියාව ද යුරියා මෙට්‍රික් ටොන් එකක් මිලදී ගැනීම සඳහා අමෙරිකානු ඩොලර් 900ක මුදලක් ඇති බව එම කාර්යාලය වැඩිදුරටත් අවධාරණය කරයි.
