ඉන්දියාවේ තමිල්නාඩු ප්‍රාන්ත මැතිවරණයෙන් සුපිරි නළු තලපති විජේ ජයග්‍රහණය කිරීමත් සමඟ ප්‍රාන්තයේ හිටපු මහ ඇමති එම්.කේ.ස්ටාර්ලින් සිය ධුරයෙන් ඉල්ලා අස්වී තිබේ.
තමිල්නාඩු ප්‍රාන්ත මැතිවරණයේ අවසන් ප්‍රතිඵලවලට අනුව සුපිරි නළු විජේගේ නායකත්වයෙන් යුත් TVK පක්ෂය ජය වාර්තා කළේය.
එම පක්ෂය ප්‍රාන්ත ආසන 234න් ආසන 108ක් හිමිව ඇති අතර හිටපු ප්‍රධාන අමාත්‍ය එම්.කේ.ස්ටාර්ලින්ගේ නායකත්වයෙන් යුතු DMK පක්ෂයට හිමිව ඇත්තේ ආසන 59ක් පමණයි.
දශක ගණනක් පුරා DMK පක්ෂයට කරට කර තරගයක් දුන්, වර්තමානයේ අගමැති නරේන්ද්‍ර මෝදිගේ භාරතීය ජනතා පක්ෂය සමඟ සන්ධානගතව සිටින AIADMK පක්ෂය පවා දිනා ඇත්තේ ආසන 47ක් පමණයි.
වසර 50කට වැඩි කාලයක් ද්‍රවිඩ දේශපාලනයේ බලකොටුවක් වූ තමිල්නාඩුව DMK වැනි ප්‍රධාන ධාරාවේ පක්ෂවලට මෙවර බලය අහිමිවීම විශේෂත්වයකි.
කෙසේ නමුත් ප්‍රාන්ත බලය තහවුරු කරගැනීමට ආසන 118ක් අවශ්‍ය වන අතර, එය තහවුරු කරගැනීමට විජේගේ පක්ෂය අනෙක් පාර්ශ්වයක සහාය ලබාගැනීමට සිදුවේ.
ඉන් අනතුරුව දමිළ සිනමාවේ කිරුළු නොපළන් රජු වන ජෝෂප් විජේ ට තමිල්නාඩුවේ මිළඟ උරුමක්කාරයා බවට පත්වෙමින් ප්‍රාන්ත මහ ඇමති ධුරයට දැරීමට හැකිවනු ඇත.
මේ අතර තමිල්නාඩු ප්‍රාන්තයේ බලය සුපිරි නළු විජේට හිමිවීම සම්බන්ධයෙන් ඉන්දීය අග්‍රාමාත්‍ය නරේන්ද්‍ර මෝදි ද සිය සුබ පැතුම් එක්කර තිබේ.
අග්‍රාමාත්‍යවරයා X ගිණුමේ සටහනක් තබමින් ප්‍රකාශ කර ඇත්තේ TVK පක්ෂය මෙවර මැතිවරණයේ දී පෙන්වූ සුවිශේෂී දක්ෂතාව පිළිබදව සිය ප්‍රශංසාව පළකරන බවය.
