ඉන්දීය මධ්යම රජයට මෙන්ම ශ්රී ලාංකීය දෙමළ ජනතාවගේ ගැටලු සම්බන්ධයෙන් තීරණාත්මක සාධකයක් වන තමිල්නාඩු ප්රාන්ත මැතිවරණයේ ප්රතිඵල නිකුත් කිරීම සඳහා මේ වන විට සියලු කටයුතු සූදානම් කර ඇති බව ඉන්දීය මාධ්ය වාර්තා කරයි.
ඒ අනුව එළැඹෙන 04 වැනිදා පස්වරුවේ මැතිවරණ ප්රතිඵල නිකුත් කෙරෙනු ඇත.
තමිල්නාඩු ප්රාන්ත මැතිවරණයේ ඡන්ද විමසිම පසුගිය අප්රේල් 23 වැනිදා ඉතා උණුසුම් අයුරින් නිමාවට පත්විය.
කෙසේ වෙතත් සමස්ත ඉන්දියාවේ පමණක් නොව ලොව පුරා වෙසෙන ද්රවිඩ ජනතාවගේ අවධානය මේ වන විට යොමුව ඇත්තේ ඡන්ද ප්රතිඵලය දෙසට වේ.
මේවර මහමැතිවරණයේ වාර්තාගත ඡන්ද ප්රතිශතයක් ඡන්ද භාවිත කිරීම කැපී පෙනෙන ලක්ෂණය විය.
සියයට 85.15%ක ප්රමාණයක් ඡන්දය භාවිත කර තිබූ බවට සඳහන් වේ.
මෙය තමිල්නාඩු මැතිවරණ ඉතිහාසයේ ඉහළම ඡන්ද ප්රතිශතයක් වන අතර එය 2021 වසරට වඩා 11%ක පමණ කැපී පෙනෙන වර්ධනයක් බවද වාර්තා වේ.
මෙවර දේශපාලන සටනේ වැඩි අවධානය යොමුව තිබුණේ තමිලග වෙට්රි කලගම් පක්ෂයෙන් මැතිවරණයට ඉදිරිපත් වූ සුපිරි නළු විජේගේ ආගමනය දෙසටයි.
කෙසේ වෙතත් වර්තමාන ප්රධාන අමාත්ය එම්.කේ ස්ටාලින්ගේ නායකත්වයෙන් යුත් ද්රාවිඩ මුන්නේත්ර කලගම් සහ අන්නා ද්රාවිඩ මුන්නේත්ර කලගම් BJP ඒකාබද්ධ සන්ධානය අතර තියුණු සටනක් පැවැතිණි.
ඉන්දීය දේශපාලන විචාරකයින් සඳහන් කර ඇත්තේ මෙවර මැතිවරණයෙන්ද එම්. කේ. ස්ටාලින්ගේ නායකත්වයෙන් යුත් DMK සන්ධානය ජයගනු ඇති බවය.
TVK පක්ෂය තරුණ ඡන්ද පදනමට දැඩි බළපෑමක් එල්ල කර තිබුණද මැතිවරණ ජයග්රහණයේ වාසිය DMK පක්ෂයට හිමිව ඇති බව ඉන්දීය දේශපාලන විචාරකයින් පෙන්වා දී තිබේ.
ආසන 234කින් සමන්විත තමිල්නාඩු ප්රාන්ත සභාවේ බලය ලබා ගැනීමට නම් එක් කණ්ඩායමක් අවම වශයෙන් 118ක් ජයග්රහණය කළ යුතුවේ.
අවසන් වරට පැවැති තමිල්නාඩු මැතිවරණයේදී DMK සන්ධානය ආසන 159ක් දිනාගත් අතර එහිදී ADMK සන්ධානයට හිමිවූයේ ආසන 75ක් පමණි.
තමිල්නාඩු ප්රාන්ත මැතිවරණයේ ජයග්රහණය ඉන්දීය මධ්යම රජයේ ස්ථාවරයටද බලපාන අතර ඊට හේතුව වි ඇත්තේ තමිල්නාඩුව ඉන්දියාවේ දෙවන විශාලතම ආර්ථිකය හිමි ප්රාන්තය වීමයි.
මෙම මැතිවරණ ප්රතිඵලය මෙරටටද සෘජුවම බලපෑම් කරන අතර මතභේදාත්මක කච්චතිව් දූපත සහ ඉන්දු - ලංකා ආර්ථික සබඳතා පිළිබඳව තමිල්නාඩු රජය දරන ස්ථාවරය බොහෝ සෙයින් වැදගත් වේ.
එමෙන්ම නව තමිල්නාඩු පාලකයින් ශ්රී ලාංකික දෙමළ ජනතාවගේ ගැටලු සම්බන්ධයෙන් ඉන්දීය මධ්යම රජයට සිදුකරන බලපෑම ඉන්දු - ලංකා රාජ්ය තාන්ත්රික සබඳතාවල අනාගතයද තීරණය කරනු ඇත.
