මුම්බායි නුවර එකම පවුලේ සාමාජිකයන් සිව්දෙනෙකු මියයාමට හේතුව පැණි කොමඩු අනුභව කිරීම බවට පැතිර යාමත් සමඟ මුම්බායි සහ ඒ අවට ප්රදේශවල පැණි කොමඩු මිල විශාල ලෙස පහත වැටී තිබුණි.
පැතිර ගිය පුවත් අසත්ය බවත්, එය කිසියම් විෂ වර්ගයක් ශරීරගත වීමෙන් සිදු වූවක් බවටත් නවතම අධිකරණ වෛද්ය වාර්තා මගින් තොරතුරු අනාවරණය වී ඇති බව ඉන්දීය මාධ්ය පවසයි.
45 හැවිරිදි මොබයිල් උපාංග අලෙවිකරුවෙකු වූ අබ්දුල්ලා ඩොකාඩියා, ඔහුගේ බිරිඳ නස්රීන් (35), සහ දියණියන් දෙදෙනා වන සයිනබ් (13) සහ අයේෂා (16) මෙලෙස අවාසනාවන්ත ලෙස ජීවිතක්ෂයට පත්ව ඇත.
පසුගිය සෙනසුරාදා රාත්රියේ ඥාතීන් පිරිසක් සමඟ රාත්රී ආහාරය ගැනීමෙන් පසු, අලුයම 1:00 ට පමණ මෙම පවුලේ පිරිස පැණි කොමඩු අනුභව කර ඇත.
අලුයම 5:00 වන විට ඔවුන් සියලු දෙනා වමනය සහ පාචනය වැනි රෝග ලක්ෂණ පෙන්නුම් කරමින් අසනීප වී ඇති අතර, පැය කිහිපයක් ඇතුළත ඔවුන් මියගොස් තිබේ.
මූලික පරීක්ෂණවලට අනුව මියගිය පුද්ගලයන්ගේ මොළය, හෘදය සහ අන්ත්ර ඇතුළු අභ්යන්තර ඉන්ද්රියයන් කොළ පැහැයට හැරී ඇති බව වාර්තා වේ.
වෛද්යවරුන් පවසන්නේ සාමාන්ය ආහාර විෂ වීමකදී මෙවැනි තත්ත්වයක් ඇති නොවන බවයි.
තවද, පවුලේ ප්රධානියා වූ අබ්දුල්ලාගේ සිරුරේ තිබී මෝෆීන් (Morphine) නමැති ප්රබල වේදනා නාශකය අඩංගු වී තිබූ බවට සාධක හමු වී ඇත.
මෙය වෛද්ය උපදෙස් මත ලබාගත් එකක්ද, නැතහොත් වෙනත් සැකකටයුතු මැදිහත්වීමක්ද යන්න පිළිබඳව පරීක්ෂණ ක්රියාත්මක වේ.
කෙසේ වෙතත්, මරණය සහ කොමඩු අනුභවය අතර සෘජු සම්බන්ධයක් මෙතෙක් තහවුරු වී නොමැති බව ඉන්දීය ආහාර හා ඖෂධ පාලන අධිකාරිය පවසයි.
මෙය හදිසි මරණයක් ලෙස සලකා පොලිසිය පරීක්ෂණ පවත්වයි.
එදින රාත්රියේ ඔවුන් සමඟ ආහාර ගත් අනෙකුත් ඥාතීන් පස්දෙනාට කිසිදු සෞඛ්ය ගැටලුවක් මතු වී නොමැති අතර, පොලිසිය ඔවුන්ගෙන් ප්රකාශ සටහන් කරගෙන ඇත.
පවුල කිසියම් මානසික පීඩනයකින් පසු වූයේද යන්න පිළිබඳවද අවධානය යොමුව තිබේ.
වැඩිදුර විද්යාත්මක පරීක්ෂණ සඳහා මියගිය අයගේ ශරීර කොටස් රසායනාගාර වෙත යවා ඇති අතර, අවසන් වාර්තාව ලැබෙන තෙක් මරණයට නිශ්චිත හේතුව ප්රකාශ කළ නොහැකි බව බලධාරීන් අවධාරණය කරයි.
