බේරාගැනීම්, පුනරුත්ථාපන සහ වස්තුභංගත්ව පනත් කෙටුම්පතට අනුමැතිය
April 30, 2026 04:51 pm
බේරාගැනීම්, පුනරුත්ථාපන සහ වස්තුභංගත්ව (ආයතනික සහ පුද්ගලික) පනත් කෙටුම්පත රජයේ මුදල් පිළිබඳ කාරක සභාවේදී සලකා බලා අනුමත කර තිබේ.
ඒ එම කාරක සභාව පාර්ලිමේන්තු මන්ත්රී ආචාර්ය හර්ෂ ද සිල්වා මහතාගේ සභාපතිත්වයෙන් පසුගිය 28 වෙනිදා රැස්වූ අවස්ථාවේදීය.
මෙම කෙටුම්පත තැනැත්තන් සහ සමාගම් බේරා ගැනීමට, පුනරුත්ථාපනය කිරීමට සහ තැනැත්තන්ගේ සහ සමාගම්වල වස්තුභංගත්වයට අදාළ නීතිය සංශෝධනය කිරීම සහ ඒකාබද්ධ කිරීම සඳහා ද, (97 වන අධිකාරය වූ) වස්තු භංගත්ව ආඥාපනත ඉවත් කිරීම සඳහා ද, 2007 අංක 07 දරන සමාගම් පනත සංශෝධනය කිරීම සඳහා ද, 2017 අංක 24 දරන දේශීය ආදායම් පනත සංශෝධනය කිරීම සඳහා ද, 1988 අංක 72 දරන සමථ මණ්ඩල පනත සංශෝධනය කිරීම සඳහා ද, ඊට සම්බන්ධ හෝ ඊට ආනුෂංගික කරුණු සඳහා විධිවිධාන සැලැස්වීම පිණිස ඉදිරිපත් කර ඇත.
ඒ අනුව මෙම පනත් කෙටුම්පත මගින් පනතේ නිශ්චිතව දක්වා ඇති බලතල හා කාර්යයන් ක්රියාත්මක කිරීම සඳහා වස්තුභංගත්ව නියාමන අධිකාරිය ස්ථාපිත කෙරේ. ඒ ඔස්සේ වෘත්තීය ප්රමිතීන්, අධීක්ෂණ කටයුතු සහ මහජන විශ්වාසය සහතික කිරීම අපේක්ෂා කෙරේ.
තවද ණයගැතියාගේ ආරක්ෂාව සමග ණයගැතියාට දෙනු ලබන සහන සමතුලිත කිරීම උදෙසාද මෙම පනත් කෙටුම්පත මගින් විධිවිධාන සලසා ඇත.
ඒ අනුව ණය ආපසු ගෙවීම අත්හිටුවීමේ නියෝගයක් නිකුත් කිරීමේ ප්රතිපාදනද පනත් කෙටුම්පත මගින් දක්වා ඇති බව කරුණු දක්වමින් අධිකරණ අමාත්යාංශ නිලධාරීහු පැවසුහ.
එමෙන්ම ණයගැතියා පුනරුත්ථාපනය සඳහා සුදානම් වන අතරතුර ණය හිමියා බලාත්මක කිරීමේ ක්රියාමාර්ග අත්හිටුවන තාවකාලික දින 60ක කල් දැමීමේ කාලයක් හඳුන්වා දී තිබේ.
තවද සීමිත ආදායමක් සහ සීමිත වත්කම් සහිත ණයගැතියන් සඳහා සරල කළ, වේගවත්, අඩු වියදම් සහිත නඩු කටයුතු සඳහා පහසුකම් සැපයීමට ද, ශ්රී ලංකාව තුළ මූල්යමය වශයෙන් පීඩාවට පත්ව ඇති එහෙත් ගෙවීමේ හැකියාව ඇති ව්යාපාර බේරාගැනීම හෝ ප්රතිව්යුහගත කිරීම කෙරෙහි නැඹුරු වූ "පරිපාලන" ක්රියා පටිපාටියක් හඳුන්වා දීමටද පනත් කෙටුම්පත මගින් ප්රතිපාදන සලසා ඇති බව අධිකරණ අමාත්යාංශ නිලධාරීහු පැවසුහ.
වස්තුභංගත්වයේ නීති කටයුතුවලට වඩා සරල හා ලාභදායී වන පරිදි ක්ෂුද්ර, කුඩා හා මධ්ය පරිමාණ ව්යාපාර (MSME) සඳහා ප්රතිව්යුහගත කිරීමේ ක්රියාපටිපාටිය මෙම පනත් කෙටුම්පත මගින් සකස් කර ඇති බව ඔවුන් පෙන්වා දුන්නහ.
ණය හිමියන් ආරක්ෂා කිරීම සහ වටිනාකම ආරක්ෂා කිරීමේ අරමුණින් ණයගෙවීමට නොහැකි වීම, වැරදි සහගත වෙළදාම සහ වංචනික හෝ වරණීය ගනුදෙනු වළක්වා ගැනීම පිළිබඳ නීති අන්තර්ගතව පවතින බව ද අධිකරණ අමාත්යාංශ නිලධාරීහු ප්රකාශ කළහ.
ලෝක බැංකු හවුල්කාරිත්වය සහ ජාත්යන්තර වෙළඳ නීතිය පිළිබඳ එක්සත් ජාතීන්ගේ කොමිසම විසින් ප්රවර්ධනය කරන ලද භාවිතයේ පවතින හොඳම ප්රමිතීන්ට අනුකූලව මෙම පනත් කෙටුම්පත සම්පාදනය කර ඇති බව ද ඔවුහු වැඩි දුරටත් අදහස් දක්වමින් පැවසුහ.
මෙහිදී අදහස් දක්වමින් කාරක සභා සභාපතිවරයා, මෙම පනත් කෙටුම්පත මීට පෙර පාර්ලිමේන්තුවට ඉදිරිපත් කිරීමට කටයුතු සිදු කර තිබුණේ නම්, ඉන් මෙරට ප්රජාවට තවත් බොහෝ ප්රතිලාභ හිමි වන්නට තිබූ බව අවධාරණය කළේය.
එමෙන්ම, පනත් කෙටුම්පත මගින් ගෙන එනු ලබන සාධනීය පියවරයන් රැසක් සම්බන්ධව කාරක සභාවේ ප්රසාදය පළකරමින් කරමින්, එය පාර්ලිමේන්තුවේදී සම්මත වීමෙන් අනතුරුව ප්රායෝගිකව ක්රියාත්මක කිරීමේ වගකීම නිලධාරීන්ට පැවරෙන බවත් එම කටයුතු කැපවීමෙන් ඉටු කිරීමේ වැදගත් කමද සභාපතිවරයා අවධාරණය කර සිටියේය.
මෙම අවස්ථාවේදී පෞද්ගලික අංශයේ හා සිවිල් සමාජය නියෝජනය කරන පාර්ශවකරුවන්ගේ අදහස්ද සලකා බැලිණි.
