2025 වසර තුළ ශ්‍රී ලංකාවේ වාහන ආනයන වියදම ඉතිහාසයේ තුන්වන ඉහළම මට්ටමට ළඟා වී ඇති බව ශ්‍රී ලංකා මහ බැංකුව විසින් නිකුත් කළ 2025 වාර්ෂික ආර්ථික විවරණයෙහි සඳහන් වේ.
මෝටර් රථ ආනයන සීමාවන් අදියරෙන් අදියර ලිහිල් කිරීමත් සමඟ, 2025 ජනවාරි මාසය වන විට පෞද්ගලික රථවාහන සඳහා පැවති සියලු සීමා ඉවත් කර තිබුණි.
එමෙන්ම, දිගුකාලීන සීමාකිරීම්වලින් පසුව ඇතිවිය හැකි ඉල්ලුම පාලනය කිරීම සඳහා රජය විසින් තීරුබදු සහ තීරුබදු නොවන ප්‍රතිපත්ති පියවර කිහිපයක් ද හඳුන්වා දී තිබුණි.
කෙසේ වෙතත්, මෙම පියවර තිබියදීත් 2025 වසර තුළ වාහන ආනයනය සැලකිය යුතු ලෙස ඉහළ ගොස් ඇති අතර, එය වසර ගණනාවක් පුරා සීමා කිරීම් හේතුවෙන් එකතු වූ ඉල්ලුම සහ ආර්ථික ක්‍රියාකාරකම්වල වැඩිදියුණු වීම පිළිබිඹු කරන බව සඳහන් වේ.
විශේෂයෙන් 2025 අප්‍රේල් මාසයෙන් පසු ආනයනවල කැපී පෙනෙන වර්ධනයක් දක්නට ලැබී ඇති අතර, පෞද්ගලික සහ වාණිජ වාහන යන කාණ්ඩ දෙකම එක්ව වාහන ආනයන වියදම එ.ජ. ඩොලර් බිලියන 2.04ක් දක්වා ඉහළ ගොස් තිබේ.
මෙය 2015 වසරේ වාර්තා වූ එ.ජ. ඩොලර් බිලියන 2.12 සහ 2018 වසරේ වාර්තා වූ එ.ජ. ඩොලර් බිලියන 2.09ට පසු වාර්තා වූ තුන්වන ඉහළම වාර්ෂික වාහන ආනයන වියදම ලෙසද සැලකේ.
