ඊශ්‍රායලය සහ අමෙරිකාව ඒකාබද්ධව සිදුකරන ඉරානයට එරෙහි යුද මෙහෙයුම ආරම්භ කර අදට (04) දින 36ක් ගතවී ඇත.
----------------------------------
UPDATE - 07.40 PM
අමෙරිකානු යුද ගුවන් යානා බිම හෙළීම සම්බන්ධයෙන් ඉරානයේ ප්‍රධාන ඒකාබද්ධ හමුදා අණ දෙන නිලධාරියා ගුවන් ආරක්ෂක පද්ධති සඳහා සිය ප්‍රණාමය පුද කර ඇති බව ඉරාන රාජ්‍ය අනුබද්ධ IRNA ප්‍රවෘත්ති ඒජන්සිය වාර්තා කරයි.
-----------------------------------
UPDATE - 06.27 PM
එක්සත් ජාතීන්ගේ ආරක්ෂක මණ්ඩලය වෙත ඉදිරිපත් කර ඇති හෝමූස් සමුද්‍ර සන්ධිය පිළිබඳ යෝජනාව සම්බන්ධයෙන් අද (04) ඡන්ද විමසීමක් පැවැත්වීමට සැලැසුම් කර තිබුණ ද එය ලෙස සිදු නොවනු ඇති බව බීබීසී පුවත් සේවය සඳහන් කරයි.
-----------------------------------
UPDATE - 06.27 PM
අමෙරිකාව සහ ඊශ්‍රායලය විසින් ඉරානයට ප්‍රහාර එල්ල කිරීමත් සමඟ ඉරානය විසින් ඩ්‍රෝන සහ මිසයිල ප්‍රහාර 453ක් එල්ල කර ඇති බව බහරේනය නිවේදනය කරයි.
-----------------------------------
UPDATE - 05.43 PM
ඉරානය විසින් තම රටට අද (04) දින එල්ලන කළ බැලස්ටික් මිසයිල 23ක් සහ ඩ්‍රෝන යානා 56ක් විනාශ කළ බව එක්සත් අරාබි එමීර් රාජ්‍යයේ ආරක්ෂක අමාත්‍යාංශය නිවේදනය කර ඇත.
-----------------------------------
UPDATE - 05.20 PM
ඉරානය විසින් බිමට හෙළන ලද අමෙරිකානු ගුවන් හමුදාවට අයත් F-15 යානයේ සිටි දෙවන අමෙරිකානු කාර්ය මණ්ඩල සාමාජිකයා අත්අඩංගුවට ගත් බවට පළ වන ප්‍රකාශ ඉරාන රජය ප්‍රතික්ෂේප කර තිබේ.
-----------------------------------
UPDATE - 05.10 PM
බුෂෙහ්ර් න්‍යෂ්ටික බලාගාරය අසලට එල්ල වූ ප්‍රහාරය ඉරානයට මෙන්ම සමස්ත ගල්ෆ් කලාපයටම බරපතළ අවදානමක් ගෙන දෙන බව ඉරාන විදේශ අමාත්‍ය අබ්බාස් අරග්චි අනතුරු අඟවා සිටී.
බුෂෙහ්ර් න්‍යෂ්ටික බලාගාරයට මේ වන විට සිව් වතාවක් ප්‍රහාරයට ලක්ව ඇති බව ද ඔහු වැඩිදුරටත් පැවසීය.
-----------------------------------
UPDATE - 04.55 PM
මූලික අවශ්‍යතා සහ මානුෂීය ආධාර රැගත් නෞකාවලට හෝමූස් සමුද්‍ර සන්ධිය හරහා ගමන් කිරීම සඳහා ඉරාන බලධාරීන් විසින් බලපත්‍ර නිකුත් කර ඇති බව විදෙස් මාධ්‍ය වාර්තා කර තිබේ.
මෙම අවසරය විශේෂයෙන්ම ඉරාන වරායන් වෙත හෝ ඕමාන් මුහුදේ පිහිටි වරායන් වෙත ගමන් කරන නෞකා සඳහා පමණක් අදාළ වන බව එම වාර්තාවේ වැඩිදුරටත් සඳහන් වේ.
--------------------------
UPDATE - 04.15 PM
ඉරානයේ අගනුවර වන ටෙහෙරානය ඉලක්ක කරගනිමින් තවත් ප්‍රහාර මාලාවක් එල්ල කළ බව ඊශ්‍රායල හමුදාව පවසා තිබේ.
------------------------------------
UPDATE - 03.50 PM
ඉරානයේ ඉස්ෆහන් පළාතේ මොබරසෙහ් ප්‍රදේශයට එල්ල වූ ප්‍රහාරයකින් රතු අඩසඳ සංවිධානයේ සේවකයෙකු මියගොස් ඇති බව විදෙස් මාධ්‍ය වාර්තා කරයි.
-----------------------------------
UPDATE - 03.06 PM
ඉරානයේ න්‍යෂ්ටික බලාගාරයට එල්ල වූ ප්‍රහාරයකින් එක් පුද්ගලයෙකු මියගොස් ඇති බව විදෙස් මාධ්‍ය වාර්තා කර තිබේ.
-------------------
UPDATE - 03.00 PM
ඉරාකයේ අල්-කායිම් නගරයේ පිහිටි Popular Mobilisation Forces (PMF) මූලස්ථානයට එල්ල වූ ප්‍රහාරයකින් එහි සාමාජිකයෙකු මියගොස් තවත් අයෙකු තුවාල ලබා ඇති බව විදෙස් මාධ්‍ය වාර්තා කරයි.
මෙම ප්‍රහාරය සම්බන්ධයෙන් නිවේදනයක් නිකුත් කරමින් PMF සංවිධානය මෙය සියොන්වාදී-ඇමරිකානු ප්‍රහාරයක් ලෙස හඳුන්වමින් චෝදනා කර ඇත.
-----------------------
UPDATE - 02.25 PM
උතුරු ඊශ්‍රායලයේ කිරියත් ශ්මෝනා නගරය ඉලක්ක කරගනිමින් රොකට් ප්‍රහාර මාලාවක් එල්ල කළ බව ලෙබනන සන්නද්ධ කණ්ඩායම පවසයි.
-----------------------
UPDATE - 01.45 PM
ඉරානයේ අන්තර්ජාලය විසන්ධි කර අදට (04) දින 36ක් සපිරෙන අතර, පැය 840කට වැඩි කාලයක් එරට බහුතරයක් පරිශීලකයින් ලෝකයෙන් හුදකලා වී ඇත.
---------------------
UPDATE - 01.00 PM
ටෙහෙරාන් නුවර පිහිටි ත්‍රස්තවාදී පාලන තන්ත්‍රයේ යටිතල පහසුකම් ඉලක්ක කරගනිමින් එල්ල කළ ප්‍රහාර මාලාවක් අවසන් කළ බව ඊශ්‍රායල ආරක්ෂක බලකාය පවසයි.
---------------------
UPDATE - 12.15 PM
ඉරානය විසින් බිම හෙළු අමෙරිකානු ප්‍රහාරක ජෙට් යානයේ සිටි ගුවන් නියමුවා සොයා ගැනීමට ඇමරිකාව සහ ඉරානය දැඩි උත්සාහයක නිරත වේ.
-------------------------------
UPDATE - 11.46 AM
ඉරාකයේ බටහිර ප්‍රදේශයේ අල්-කායිම් නගරයේ පිහිටි PMF මූලස්ථානයට සහ Mosul නගරයේ පිහිටි එම කණ්ඩායමේ 34 වන බළකායේ මූලස්ථානයට ගුවන් ප්‍රහාර මාලාවක් එල්ල වී තිබේ.
---------------------------------
UPDATE - 11.30 AM
දකුණු ලෙබනනයේ Tyre නගරයේ ප්‍රදේශයකට, ඊශ්‍රායලය විසින් එල්ල කළ ප්‍රහාරයකින් පුද්ගලයින් දෙදෙනෙකු මියගොස් ඇති බව විදෙස් මාධ්‍ය වාර්තා කර ඇත.
----------------------------------
UPDATE - 11.03 AM
ඉරානයට එරෙහි යුද්ධය ආරම්භ වීමෙන් අනතුරුව පළමුවරට ප්‍රංශයට අයත් යාත්‍රාවක් සහ ජපානයට අයත් යාත්‍රාවක් ඊයේ (03) හෝමූස් සමුද්‍ර සන්ධිය තරණය කර ඇති බව විදෙස් වාර්තා පවසයි.
--------------------
UPDATE - 10.22 AM
අමෙරිකාව හා ඊශ්‍රායලය එක්ව ඉරානයට එරෙහි යුද්ධය ආරම්භ කළ ඉකුත් පෙබරවාරි 28වනදා සිට මේ දක්වා කාලය තුළ අමෙරිකානු සෙබළුන් 350කට අධික සංඛ්‍යාවක් තුවාල ලබා තිබේ.
පෙන්ටගනය විසින් නිකුත් කරන ලද නවතම සංඛ්‍යාලේඛනවලට අනුව යුද, ගුවන්, නාවික හා මැරීන් යන සිව් අංශයන්හි සෙබළු 365ක් තුවාල ලබා ඇත.
-----------------------
UPDATE - 10.00 AM
ඉරානය විසින් එල්ල කළ ප්‍රහාරයකින් බිම හෙළු අමෙරිකානු ප්‍රහාරක ජෙට් යානයේ සිටි ගුවන් නියමුවා සොයාදෙන්නෙකුට ත්‍යාගයක් ලබා දෙන බව ටෙහෙරාන් රජය ඉරාන වැසියන්ට දැනුම්දීමක් කර ඇත.
-----------------------------------
UPDATE - 9.45 AM
සිරියාවේ අගනුවර වන දමස්කස් සහ එහි අවට ප්‍රදේශවල අද (4) අලුයම පිපිරීම් ඇසුණු බව එරට රාජ්‍ය රූපවාහිනිය පවසයි.
කෙසේ නමුත් ඒ සම්බන්ධයෙන් නිෂ්චිත හේතුවක් වාර්තා කර නොමැති අතර, බොහෝ දුරට එම හඬ ඊශ්‍රායල ගුවන් ආරක්ෂක පද්ධති විසින් ඉරාන මිසයිල ග්‍රහණය කර ගැනීමක් වන්නට ඇති බවට එරට රාජ්‍ය රූපවාහිනිය පවසා තිබේ.
----------------------------------
UPDATE - 8.30 AM
අමෙරිකාව හා ඊශ්‍රායලය එක්ව ඉරානයට එරෙහි යුද්ධය ආරම්භ කළ ඉකුත් පෙබරවාරි 28වනදා සිට මේ දක්වා කාලය තුළ අමෙරිකානු සෙබළුන් 350කට අධික සංඛ්‍යාවක් තුවාල ලබා තිබේ.
----------------------------------
UPDATE - 7.00 AM
ඉරානය එල්ල කළ ප්‍රහාරයකින් ඊයේ (3) බිමහෙළු F-15 ප්‍රහාරක ජෙට් යානයේ සිටි ගුවන් නියමුවා සෙවීම සඳහා ගමන්ගත් අමෙරිකානු A-10 යානයකටද මිසයිල ප්‍රහාරයක් එල්ලකර බිම හෙලා තිබේ.
හෝමූස් සමුද්‍ර සන්ධිය අසල ඉහළ අහසේ දී මෙම යානය ප්‍රහාරයට ලක්ව ඇති අතර, ඒ අනුව දිනක් තුළ අමෙරිකාවට ප්‍රහාරක යානා 2ක් අහිමි විය.
----------------------------------
UPDATE - 6.25 AM
ඉරානය විසින් එල්ල කළ ප්‍රහාරයකින් බිඳහෙළු අමෙරිකානු ප්‍රහාරක ජෙට් යානයේ සිටි ගුවන් නියමුවා සෙවීම සඳහා අමෙරිකාව මෙන්ම ඉරානයද මෙහෙයුමක් ආරම්භ කර තිබේ.
දකුණු ඉරානයේ දී ඊයේ (3) මෙලෙස බිම හෙළන ලද්දේ F-15 වර්ගයේ ප්‍රහාරක ජෙට් යානයක් වන අතර, එහි සිටි ගුවන් නියමුවන්ගෙන් එක් අයෙකු බේරාගැනීමට අමෙරිකාවට හැකිවිය.
