2026 පෙබරවාරි මාසයේදී වෙළෙඳ භාණ්ඩ සහ සේවා යන දෙකම ඇතුළුව ශ්‍රී ලංකාවේ මුළු අපනයන අමෙරිකානු ඩොලර් මිලියන 1,401.78ක් ලෙස වාර්තා වී තිබේ.
එය 2025 පෙබරවාරි මාසයට සාපේක්ෂව 4.22% ක වාර්ෂික වර්ධනයක් පෙන්නුම් කරන බව ශ්‍රී ලංකා අපනයන සංවර්ධන මණ්ඩලය (EDB) පවසයි.
ශ්‍රී ලංකා රේගුවේ තාවකාලික දත්තවලට අනුව, මැණික් හා ස්වර්ණාභරණ සහ ඛනිජ තෙල් නිෂ්පාදන සඳහා ඇස්තමේන්තුගත සංඛ්‍යාලේඛන සමඟ, 2026 පෙබරවාරි මාසයේ වෙළඳ භාණ්ඩ අපනයනය 1.32% කින් ඉහළ ගොස් අමෙරිකානු ඩොලර් මිලියන 1,066.88ක් වී තිබේ.
සේවා අපනයනය සමස්ත අපනයන වර්ධනයට ප්‍ර‍ධාන ශක්තියක් වී ඇති බවද ශ්‍රී ලංකා අපනයන සංවර්ධන මණ්ඩලය පෙන්වා දෙයි.
ඒ අනුව සේවා අපනයනය අමෙරිකානු ඩොලර් මිලියන 334.9ක් ලෙස ඇස්තමේන්තු කර ඇත. එය 2025 වසරේ පෙබරවාරි මාසයට වඩා 14.68% ක වැඩිවීමකි.
2026 ජනවාරි සිට පෙබරවාරි දක්වා කාලය තුළ මුළු අපනයනය අමෙරිකානු ඩොලර් මිලියන 2,896.31ක් ලෙස ඇස්තමේන්තු කර ඇති අතර එය 2025 වසරේ එම කාලයට සාපේක්ෂව 7.56% ක කැපී පෙනෙන වර්ධනයකි.
අපනයන ආදායමේ වර්ධනය, භාණ්ඩ අපනයනය ස්ථාවර වීම, සේවා අපනයනය වර්ධනය වීම මගින් ශ්‍රී ලංකාවේ විදේශ විනිමය ශක්තිමත් වී ඇති බවද ශ්‍රී ලංකා අපනයන සංවර්ධන මණ්ඩලය සඳහන් කරයි.
