ඉන්ධන මිල ඉහළ යෑමත් සමග බස් ගාස්තු වැඩිවීම සැලකිල්ලට ගෙන, ජනතාව වැඩි වශයෙන් දුම්රිය භාවිතා කිරීමට යොමුවී ඇති බව දුම්රිය ස්ථානාධිපතිවරුන්ගේ සංගමය පවසයි.
එම සංගමයේ ප්‍රධාන ලේකම් කසුන් චාමර ජයසේකර මහතා අද (25) මාධ්‍ය සාකච්ඡාවක් පවත්වමින් පවසා සිටියේ, මේ හේතුවෙන් දුම්රිය දෙපාර්තමේන්තුව මෙම දින කිහිපය තුළ ලාභ ලබමින් සිටින බවය.
තෙල් මිල ඉහළ යෑම හේතුවෙන් ඉදිරියේදී භාණ්ඩ ප්‍රවාහනය සිදුකිරීම සඳහාද ජනතාව දුම්රිය වෙත ජනතාව යොමුවනු ඇති බවත්, ඒ හේතුවෙන් ඉදිරියේදී දුම්රිය වාර ප්‍රමාණය වැඩි කරන ලෙසත් ඔහු වගකිව යුතු පාර්ශ්වයන්ගෙන් ඉල්ලා සිටී.
කොළඹ කොටුවට පැමිණෙන සහ ආපසු යන මගීන් සංඛ්‍යාව කැපී පෙනෙන ලෙස ඉහළ ගොස් ඇති බව කසුන් චාමර ජයසේකර මහතා පවසයි.
කෙසේ නමුත් මගී ඉල්ලුම වැඩි වුවද දුම්රිය ගමන් වාර කප්පාදු කිරීම හේතුවෙන් ජනතාව දැඩි පීඩාවකට පත්ව සිටින බව ඔහු පෙන්වා දෙයි.
එමෙන්ම පවතින ආර්ථික අපහසුතා සැලකිල්ලට ගෙන දුම්රිය ගාස්තු සංශෝධනයක් සිදු නොකරන්නැයි ඔහු ඉල්ලා සිටී.
ජනතාවට ඇති එකම සහනදායී ප්‍රවාහන ක්‍රමය දුම්රිය බවත් ඔහු අවධාරණය කරයි.
