මැද පෙරදිග යුදගිනි නිමන්න පාකිස්තානය සහාය දෙන්න සූදානමින්

මැද පෙරදිග පවතින දරුණු යුද වාතාවරණය නිමා කිරීම සඳහා අමෙරිකාව සහ ඉරානය අතර සාකච්ඡා සඳහා සත්කාරකත්වය සැපයීමට තමන් සූදානම් බව පාකිස්තාන අග්‍රාමාත්‍ය ෂෙහ්බාස් ෂරීෆ් ප්‍රකාශ කර තිබේ.

මෙම ප්‍රකාශය සිදු වූයේ, ඉරාන බලාගාරවලට බෝම්බ හෙලන බවට එල්ල කළ තර්ජන අමෙරිකානු ජනාධිපති ඩොනල්ඩ් ට්‍රම්ප් විසින් තාවකාලිකව අත්හිටුවීමෙන් පසුවය.

සිය  'X' ගිණුමේ සටහනක් තබමින් අග්‍රාමාත්‍ය ෂරීෆ් මහතා සඳහන් කළේ, මැද පෙරදිග යුද්ධය අවසන් කිරීම සඳහා දැනට සිදුවෙමින් පවතින සාකච්ඡාමය ප්‍රයත්නයන් පාකිස්තානය පිළිගන්නා අතර ඒ සඳහා පූර්ණ සහයෝගය ලබා දෙන බවය.

කලාපීය ස්ථාවරත්වය වෙනුවෙන් පාකිස්තානය මෙලෙස මැදිහත්කරුවෙකු ලෙස කටයුතු කිරීමට කැමැත්ත පළ කිරීම ජාත්‍යන්තර දේශපාලනයේ විශේෂ අවධානයට ලක්ව තිබේ.