යුද ගිනි ඇවිළෙන මැදපෙරදිග - නවතම යාවත්කාලීන කිරීම් මෙතැනින්

ඊශ්‍රායලය සහ අමෙරිකාව ඒකාබද්ධව සිදු කරන ඉරානයට එරෙහි යුද මෙහෙයුම ආරම්භ කර අදට (17) දින 18ක් ගතවී තිබේ.

----------------------------

10.02am

ශ්‍රී ලංකාවට ඔබ්බෙන් වූ මුහුදු තීරයේදී IRIS Dena නෞකාවට ප්‍රහාරයක් එල්ල කර එහි සිටි නාවිකයින් ඝාතනය කිරීමේ සිදුවීම සම්බන්ධයෙන් සිය සතුරු පාර්ශ්වයන්ට මාරාන්තික ප්‍රතිප්‍රහාර එල්ල කරන බව ඉරාන නාවික හමුදාපති ෂහ්රම් ඉරානි අනතුරු අඟවා තිබේ.

ඔහු පවසා ඇත්තේ, "අපි සතුරාගේ මෙම අපරාධය අමතක නොකරන අතර, අපගේ ප්‍රාණ පරිත්‍යාගීන්ගේ රුධිරය වෙනුවෙන් නිසැකවම පළිගන්නා" බවය.

එමෙන්ම සතුරා බලාපොරොත්තු නොවන ස්ථානයක සිට එල්ල කරන මාරාන්තික ප්‍රහාර මගින් ඔවුන්ට දඬුවම් කරන බවද ඔහු වැඩිදුරටත් සඳහන් කළේය.

------------------------------------

10.00am

ඉරානයේ සිට එල්ල වන මිසයිල සහ ඩ්‍රෝන ප්‍රහාර එක්සත් අරාබි එමීර් රාජ්‍යයේ ගුවන් ආරක්ෂක පද්ධති (Air defences) මගින් මේ වන විට මැඩපවත්වමින් සිටින බව එරට ආරක්ෂක අමාත්‍යාංශය ප්‍රකාශ කළේය.

-----------------------------------

09.30am

ටෙහෙරාන් නගර මධ්‍යයට ආසන්නයේ පිහිටි අන්දර්ස්ගූ ප්‍රදේශයේ දැවැන්ත පිපිරීමක් සිදුව ඇති බව විදෙස් මාධ්‍ය වාර්තා කර ඇත.

-------------------------------

09.00am

බැග්ඩෑඩ් ගුවන්තොටුපළ අසල පිහිටි අමෙරිකානු රාජ්‍යතාන්ත්‍රික මධ්‍යස්ථානයක් ඉලක්ක කර ගනිමින් රොකට් ප්‍රහාර මාලාවක් එල්ල වී ඇති බව වාර්තා වේ.

----------------------------

08.11am

ඉරානය විසින් එල්ල කරන ලද ප්‍රහාර හේතුවෙන් තාවකාලිකව වසා දැමූ එක්සත් අරාබි එමීර් රාජ්‍යයේ ගුවන් කලාපය යළි විවෘත කර තිබේ.

----------------------------

08.01am

සෞදි අරාබියේ නැගෙනහිර කලාපයේදී ඩ්‍රෝන යානා හයක් සාර්ථකව හඳුනාගෙන විනාශ කළ බව සෞදි ආරක්ෂක අමාත්‍යාංශය පවසයි.

---------------------------------------

07.55am

බැග්ඩෑඩ්හි, ජදිරියා දිස්ත්‍රික්කයේ නිවසකට එල්ල වූ ගුවන් ප්‍රහාරයකින් පුද්ගලයන් සිව්දෙනෙකු මියගොස් තවත් කිහිප දෙනෙකු තුවාල ලබා ඇති බව විදෙස් මාධ්‍ය වාර්තා කර තිබේ.
-------------------------------------

07.45am

ටෙහෙරානයට දැවැන්ත ප්‍රහාර මාලාවක් එල්ල කළ බව ඊශ්‍රායලය පවසයි.

ඊශ්‍රායල හමුදාව ප්‍රකාශ කර සිටියේ තමන් එල්ල කළ නවතම ප්‍රහාර මාලාවේ ඉලක්කය වූයේ ඉරාන අගනුවර පිහිටි යටිතල පහසුකම් බවය.

----------------------------

07.20am

ආසියානු වෙළෙඳපොළේ අද (17) පෙරවරුව වන විට බ්‍රෙන්ට් වර්ගයේ බොරතෙල් මිල 2.8%කින් ඉහළ ගොස් බැරලයක් ඩොලර් 103.08ක් ලෙස වාර්තා වී තිබේ.

එමෙන්ම අමෙරිකානු බොරතෙල් මිලද 3%කින් පමණ ඉහළ ගොස් ඩොලර් 96.25ක් ලෙස සටහන් ව ඇති බවද සඳහන් වේ.

හෝමූස් සමුද්‍ර සන්ධිය හරහා නෞකා කිහිපයක් ආරක්ෂිතව ගමන් කර ඇති බවට වාර්තා වීමත් සමග ඊයේ (16) දිනයේ තෙල් මිල සුළු වශයෙන් පහත වැටුණි.

මේ අතර බලශක්ති අවශ්‍යතා සඳහා ගල්ෆ් කලාපයේ තෙල් මත යැපෙන ජපානය සහ දකුණු කොරියාව ඇතුළු ආසියානු කොටස් වෙළෙඳපොළ දර්ශක අද (17) සුළු වශයෙන් ඉහළ අගයකින් ආරම්භ විය. 
---------------------------

07.06am

බැග්ඩෑඩ්හි පිහිටි අමෙරිකානු තානාපති කාර්යාලය ඉලක්ක කර ගනිමින් ඩ්‍රෝන සහ රොකට් ප්‍රහාර මාලාවක් එල්ල වී තිබේ.

ඉරාක ආරක්ෂක අංශ පවසා ඇත්තේ මෙය ප්‍රහාර ආරම්භ වූ දා සිට එල්ල වූ දරුණුතම ප්‍රහාරය වන බවය.

මෙම ප්‍රහාරයට පැය හයකට පමණ පෙර, ඉරාකයේ සිටින අමෙරිකානු පුරවැසියන් සඳහා තානාපති කාර්යාලය විසින් ආරක්ෂක අනතුරු ඇඟවීමක් නිකුත් කර තිබුණි. 

----------------------------

06.40am

මැදපෙරදිග යුද්ධය අතරතුර, චීන ජනාධිපති ෂී ජින් පිං සමඟ පැවැත්වීමට නියමිත සමුළුව මාසයකින් පමණ ප්‍රමාද කරන ලෙස චීනයෙන් ඉල්ලා සිටි බව අමෙරිකානු ජනාධිපති ඩොනල්ඩ් ට්‍රම්ප් පවසයි.

-----------------------------

06.26am

එක්සත් අරාබි එමීර් රාජ්‍යය සිය ගුවන් කලාපය තාවකාලිකව වසා දමා තිබේ.

ඉරානය විසින් එල්ල කරන ලද නව මිසයිල සහ ඩ්‍රෝන ප්‍රහාර හමුවේ ගුවන් ගමන්, කාර්ය මණ්ඩලය සහ ජාතික භූමිය ආරක්ෂා කිරීමේ පූර්ව ආරක්ෂිත පියවරක් ලෙස ලෙස එම තීරණය ගෙන ඇත.