ශ්‍රී ලංකාවට ඔබ්බෙන් වු මුහුදු සීමාවේදී අමෙරිකානු ප්‍රහාරයකට ලක්ව ගිලී ගිය ඉරාන නෞකාවේ සිටි පුද්ගලයින් 84 දෙනෙකුගේ මළසිරුරු සොයාගෙන ඇති බව ශ්‍රී ලංකා නාවික හමුදාව පවසයි.
ඒ අනුව අතුරුදන් වූවන් සෙවීමේ මෙහෙයුම් තවදුරටත් සිදුකරන බව නාවික හමුදාව සඳහන් කළේය.
ඉරාන නාවික හමුදාවට අයත් 'IRIS Dena' නෞකාව ශ්‍රී ලංකාවට නිරත දෙසින් වූ ගැඹුරු මුහුදේදී අමෙරිකානු සබ්මැරීනයක් විසින් එල්ල කළ ප්‍රහාරයකින් මුහුදුබත් වුණි.
එය 180 දෙනෙකුගෙන් යුත් කාර්ය මණ්ඩලයක් සමඟ ඉන්දියාවේ විශාකා පට්නම්හි පැවති ජාත්‍යන්තර නාවික හමුදා යාත්‍රා පෙළ ඇගයීමේ යුද අභ්‍යාස මෙහෙයුම සඳහා සහභාගී වී සිට නැවතත් ඉරානය බලා යමින් සිටින අතරතුර අනතුරට ලක්ව තිබුණි.
අමෙරිකානු සබ්මැරිනයක සිට ටෝපිඩෝවක් ආධාරයෙන් අදාළ නෞකාවට ප්‍රහාර එල්ල කළ බව අමෙරිකානු ආරක්ෂක ලේකම් පීට් හෙග්සෙත් පවසයි.
"ඊයේ අමෙරිකානු සබ්මැරීනයක් මඟින් ජාත්‍යන්තර මුහුදේදී අප ආරක්ෂිතයි සිතා කටයුතු කළ ඉරාන යුද නෞකාවක් මුහුදුබත් කළා. එය ගිල්වා දැම්මේ ටෝපීඩෝවක් යොදාගෙන. නිහඬ මරණයක් ටෝපිඩෝවක් යොදාගෙන සතුරු නෞකාවක් ගිල්වනු ලැබුවේ දෙවැනි ලෝක සංග්‍රාමයෙන් අනතුරුව පළමුවරටයි.අපි සටන් කරන්නේ දිනන්න. නිසැකවම, විනාශකාරී ලෙස කිසිම සමාවක් නොදී අමෙරිකාව දිනනවා."
ඔහු වැඩිදුරටත් සඳහන් කළේ, දෙවන ලෝක යුද්ධයෙන් පසුව සතුරු නෞකාවක් ටෝපිඩෝවක් ආධාරයෙන් ගිල්වා දැමූ පළමු අවස්ථාව මෙය වන බවය.
අදාළ ප්‍රහාරය එල්ල කරන අයුරු දැක්වෙන වීඩියෝවක් ද මේ වන විට අමෙරිකාව විසින් නිකුත් කර ඇති බව සඳහන්ය.
