වෙඩිතියන්න පැමිණි පුද්ගලයාට ආයුධයකින් පහර දීලා

නිවසකට කඩා වැදී පුද්ගලයකුට වෙඩි තැබීමට උත්සාහ කළ නාඳුනන තුවක්කුකරුවෙකුට, එම නිවෙස් හිමියා විසින් පුටුවකින් සහ කැත්තකින් පහර දී තිබේ. 

පහර කෑමෙන් තුවාල ලබා ඇත්තේ අලව්ව, අලුත් පාර ප්‍රදේශයේ පදිංචිකරුවෙකු වේ.

මෙම සිද්ධිය සම්බන්ධයෙන් පැමිණිලිකරු පොලිසියට පවසා ඇත්තේ, කළුතර රජවත්ත ප්‍රදේශයේ පදිංචි "පෙත්තා" නැමැති අයෙකු තමාගෙන් ලබාගත් රුපියල් තිස්දහසක ණය මුදලක් යළි ලබාදීම සඳහා සිය නිවසට පැමිණි බවත් එහිදී ඔහු සමඟ පැමිණි නාඳුනන පුද්ගලයා තමාට වෙඩි තැබීමට උත්සාහ කළ බවත් ය.

එමෙන්ම එම අවස්ථාවේදී තමා සිය නිවසේ තිබූ පුටුවකින් සහ කැත්තකින් ඔහුට පහර දී පන්නා දැමූ බවත් පැමිණිලිකරු වැඩිදුරටත් සඳහන් කර ඇත.

පහර කෑමට ලක්වූ එම පුද්ගලයා පිස්තෝල වර්ගයේ ගිනිඅවියක් සහ උණ්ඩ 4ක් සමග අත්අඩංගුවට ගැනීමට පොලීසිය සමත් වී ඇත. 

පොලීසිය පැවසුවේ අදාළ පුද්ගලයා ප්‍රතිකාර සඳහා නාගොඩ රෝහලට ඇතුළත් කර ඇති බවය.

සැකකරු මේ වන විට පොලිස් ආරක්ෂාව යටතේ නේවාසිකව ප්‍රතිකාර ලබන බව ද වාර්තා වේ.