අවුරුදු 30ත් 50ත් අතර පුද්ගලයින්ට මහාන්ත්ර සහ ගුද මාර්ග පිළිකා වැළදීමේ ප්රවනතාවක්
February 26, 2026 07:28 am
ලෝකයේ මෙන්ම ශ්රී ලංකාවේ ද වයස අවුරුදු 30ත් 50ත් අතර වයස් කාණ්ඩවල පුද්ගලයින්ට මහාන්ත්ර සහ ගුද මාර්ග පිළිකා රෝග වැළදීමේ ප්රවනතාවක් පවතින බව සෞඛ්ය අංශ පවසයි.
මීට පෙර වයස අවුරුදු 50න් ඉහළ පුද්ගලයින් හට එම පිළිකා රෝග වැළදීමේ ඉහළ ප්රවනතාවක් පැවති බව ජාතික පිළිකා මර්දන වැඩසටහනේ ප්රජා වෛද්ය විශේෂඥ වෛද්ය හසරැලි ප්රනාන්දු මහත්මිය සඳහන් කළාය.
මහාන්ත්ර සහ ගුද මාර්ග පිළිකා රෝග පිළිබඳ දැනුවත් කිරීම සම්බන්ධයෙන් සෞඛ්ය ප්රවර්ධන කාර්යාංශයේ පැවති මාධ්ය හමුවට එක්වෙමින් විශේෂඥ වෛද්ය හසරැලි ප්රනාන්දු මහත්මිය මේ බව පැහැදිලි කළාය.
එහිදී වැඩිදුරටත් අදහස් දැක්වූ විශේෂඥ වෛද්ය හසරැලි ප්රනාන්දු මහත්මිය,
"2022 ජාතික පිළිකා ලේඛනයට අනුව 3,000ක් පමණ රෝගීන් වාර්තා වෙලා තියෙනවා. කාන්තාවන් ගත්තොත් කාන්තාවන්ගේ තුන්වැනි ස්ථානයේ ප්රමුඛතම පිළිකාව තමයි මේ මහා බඩවැල් සහ ගුද මාර්ගය ආශ්රිත පිළිකා. මොකද එගොල්ලන්ගේ බහුතරවම තියෙන්නේ පියයුරු පිළිකා සහ තයිරොයිඩ් ග්රන්ථිය ආශ්රිත පිළිකා.
පිරිමි පාර්ශ්වය ගත්තොත් ප්රධානම පිළිකාව වෙන්නේ මුඛ පිළිකාව. ඊළඟට දෙවැනි ස්ථානයට තමයි මහාන්ත්රය සහ ගුද මාර්ග පිළිකා වාර්තා වෙලා තියෙන්නේ.
මේක ජීවන රටාව හා සම්බන්ධ පිළිකාවක් වෙනවා. මොකද අපි ගන්නා ආහාර සහ සමබල ආහාරවේලක් නොගැනීම ප්රධාන සාධකයක් වෙනවා මේ පිළිකාව ඇති වෙන්න. ඒ වගේම තමයි ශාරීරික ක්රියාකාරකම් අඩුවීම, අධි බර සහ ස්ථූලතාවය, මත්පැන් පානය කිරීම, දුම්පානය වගේ වෙනස් කරන්න පුළුවන් සාදක මේකට සම්බන්ධ වෙලා තියෙනවා. ඒකට ඇරෙන්න පවුල් ඉතිහාසයක් තියෙනවානම් ඒකට අවදානම වැඩිවෙන්න පුළුවන් මේකට ඇතැම් ජාන ඉතිහාස තියෙනවා මේ පිළිකාව හා සම්බන්ධ වෙච්ච.
ඒ වගේම තමයි පෞද්ගලික ඉතිහාසය. ඒ කියන්නේ මින් ඉස්සෙල්ලා යම් කෙනෙකුට පිළිකාවක් ඇතිවෙලා තිබුණා නම් මහාන්ත්රය සහ ගුද මාර්ගය ආශ්රිතව ඒ කෙනෙකුට අවදානම වැඩි වෙනවා. අනිත් තත්ත්වය තමයි වයස සාමාන්යයෙන් වයසත් එක්ක පිළිකාව ඇති වීමේ ප්රවණතාව වැඩියි. එතැනදි අවුරුදු 50ට වඩා වැඩි ප්රවණතාවක තමයි මේ පිළිකාව වැළඳීම තිබුණේ. නමුත් මෑතකාලීනව ලංකාවේ වගේම ලෝකයේත් අවුරුදු 30-50දක්වා වයස් කාණ්ඩවල පුද්ගලයින්ගේ පැතිරීමේ අවදානමක් තියෙනවා."
