හැටන් නගරයේ සිල්ලර වෙළෙසැලක් පවත්වාගෙන යෑමට නගර සභාවෙන් අනුමැතිය ඉල්ලා එම අනුමැතිය ලැබීමට ප්‍රථම එහි හිමිකරු විසින් අද (28) එහි මාළු සහ කුකුළු මස් අලෙවි කිරිමට විවෘත කිරිමත් සමග හැටන් නගරයේ උණුසුම් තත්ත්වයක් ඇතිවිය.
එම වෙළෙඳසැල ඉදිරිපිටට පැමිණි හැටන් නගරයේ මත්ස්‍ය වෙළෙදුන් කියා සිටියේ, නගර සභාවේ අනුමැතියක් නොමැතිව නගර මධ්‍යයේ තවත් මත්ස්‍ය වෙළෙසැලක් විවෘත කිරිමට ඉඩලබාදිය නොහැකි බවය.
නගර සභාව මගින් 2026 වසරේ නගර සභාව සතු වෙළෙඳසැලක මත්ස්‍ය වෙළෙසැලක් පවත්වාගෙන යෑමට ටෙන්ඩර් පත් කැදවා තිබූ අතර, එහි ටෙන්ඩරයද ලක්ෂ 12ක මුදලකට ප්‍රදේශයේ මත්ස්‍ය ව්‍යාපාරිකයෙකු විසින් ලබාගෙන ඇත.
අලුතින් විවෘත කරන ලද මත්ස්‍ය වෙළෙසැලේ කුකුළු මස් සහ මාළුවලට අමතරව තවත් ආහාර ද්‍රව්‍ය රැසක් අලෙවි කිරිමට ප්‍රදර්ශනය කර තිබුණි.
එම මත්ස්‍ය වෙළෙසැල අසළම පිහිටි තවත් වෙළෙදසැල හිමියන් කියා සිටින්නේ, නගර මධ්‍යයේ මත්ස්‍ය වෙළෙසැලක් විවෘත කලහොත් එමගින් විශාල පරිසර හානියක් සිදුවීම හමුවේ තම ව්‍යාපාර කටයුතුද අඩාලවීමට ඉඩ ඇති බවය.
එම මත්ස්‍ය වෙළෙසැලට නැගුණු විරෝධය හමුවේ හැටන් පොලිසියේ නිලධාරින්, හැටන් දික්ඔය නගර සභාවේ මහජන සෞඛ්‍ය පරික්ෂකවරයා, ආදායම් පරිපාලකවරයා එක්ව වෙළෙසැලට බලපත්‍රය නිකුත් කරන තෙක් වසා දමන ලෙසට හිමිකරුට උපදෙස් දෙන ලදී.
සිද්ධිය සම්බන්ධයෙන් හැටන් දික්ඔය නගර සභාවේ සභාපති අසෝක කරුණාරත්න සභාවේ ලේකම් ශ්‍යාමලී රූපසිංහ මහත්මිය ඇතුළු එම වෙළෙසැලේ හිමිකරු සහ මත්ස්‍ය වෙළෙසැල පවත්වාගෙන යන අය සමග සාකච්ඡාවක් පවත්වා තිබේ.
එහිදි සභාපතිවරයා ඔවුන් හමුවේ කියා සිටියේ, සිල්ලර වෙළෙසැලක් පවත්වාගෙන යැමට අවසර ඉල්ලා මස් සහ මාළු විකිණීමට කිසිසේත් අවසර ලබා නොදෙන බවය.
සිල්ලර වෙළෙසැලක් පවත්වාගෙන යැමට ඉල්ලා ඇති ඉල්ලුම්පත්‍රය සම්බන්ධයෙන් ලබන මස 12වනදා නගර සභාවේ පැවැත්වෙන මාසික සභා රැස්වීමේදි සාකච්ඡා කර විසදුමක් ලබාදෙන තෙක් අවසරයක් නොමැතිව විවෘත කල වෙළෙසැල වසාදමන ලෙසය.
