ආපදා තත්ත්වයෙන් පසු පළාත් 6ක පාසල් දෙසැ: 16 යළි ඇරඹෙයි - පාසල් 147ක ආරම්භය ගැන තීරණය පසුවට

තෙවන පාසල් වාරයේ 2වන අදියර සඳහා එළඹෙන දෙසැම්බර් 16 වනදා ආරම්භ කෙරෙන පාසල් සම්බන්ධයෙන් අධ්‍යාපන අමාත්‍යාංශය අද (09) නිල වශයෙන් දැනුම්දීමක් සිදු කළේය.

අධ්‍යාපන අමාත්‍යාංශ ලේකම් නාලක කළුවැව මහතා අද පස්වරුවේ පැවැති මාධ්‍ය හමුවකදී මේ සම්බන්ධයෙන් අදහස් දැක්වීය.

ඒ අනුව දෙසැම්බර් 16 වනදා බස්නාහිර, දකුණ, උතුර, නැගෙනහිර, සබරගමුව සහ උතුරුමැද පළාත්වල සියලු පාසල් විවෘත කිරීමට නියමිතව තිබේ.

ඒ අනුව මෙරට සමස්ත පාසල් සංඛ්‍යාව වන 10,076ක් අතරින් පාසල් 9,929ක් එදිනට විවෘත කෙරේ.

කෙසේවෙතත් විවෘත කිරීමට නොහැකි පාසල් 147ක් පළාත් 3කට අයත් වන බව අධ්‍යාපන අමාත්‍යාංශ ලේකම්වරයා සඳහන් කළේය.

ඌව පළාතේ වැලිමඩ අධ්‍යාපන කලාපයට අයත් පාසල් 5ක්, බණ්ඩාරවෙල අධ්‍යාපන කලාපයට අයත් පාසල් 3ක්, බදුල්ල අධ්‍යාපන කලාපයට අයත් පාසල් 7ක්, පස්සර අධ්‍යාපන කලාපයට අයත් පාසල් 5ක් සහ වියළුව අධ්‍යාපන කලාපයට අයත් පාසල් 6ක් තවදුරටත් විවෘත නොකෙරෙන බව සඳහන් කළේය.

මහව අධ්‍යාපන කලාපයට අයත් පාසලක්, ඉබ්බාගමුව අධ්‍යාපන කලාපයට අයත් පාසල් 5ක් ලෙස වයඹ පළාතේ පාසල් 6ක් ද එදිනට විවෘත නොකෙරෙයි.

එමෙන්ම මධ්‍යම පළාතේ පාසල් 115ක් දෙසැම්බර් 16 වනදා අධ්‍යාපන කටයුතු සඳහා විවෘත නොකෙරෙන බව අධ්‍යාපන අමාත්‍යාංශ ලේකම්වරයා සඳහන් කළේය.

මහනුවර අධ්‍යාපන කලාපයේ පාසල් 4ක්, දෙනුවර අධ්‍යාපන කලාපයට අයත් පාසල් 8ක්, ගම්පොළ අධ්‍යාපන කලාපයට අයත් පාසල් 8ක්, වලපනේ  අධ්‍යාපන කලාපයට අයත් පාසල් 7ක්, හඟුරන්කෙත අධ්‍යාපන කලාපයට අයත් පාසල් 15ක්, කොත්මලේ අධ්‍යාපන කලාපයට අයත් පාසල් 17ක්, මාතලේ  අධ්‍යාපන කලාපයට අයත් පාසල් 38ක්, නාවුල අධ්‍යාපන කලාපයට අයත් පාසල් 3ක් සහ නුවරඑළිය අධ්‍යාපන කලාපයට අයත් පාසල් 15ක් විවෘත නොකෙරෙනු ඇත.

විවෘත නොකෙරෙන පාසල් පහතින්,

මේ අතර සියලු පාසල්වල තෙවැනි වාර විභාගය අවලංගු කිරීමටද අධ්‍යාපන අමාත්‍යාංශය තීරණය කර තිබේ.

නැවත පාසල් පරිසරයට දරුවන් අනුගත කර ඔවුන්ගේ මානසික සෞඛ්‍ය යහපත් කිරීම සඳහා සුදුසු ක්‍රියාකාරකම්වලට මූලිකත්වය ලබා දී කටයුතු කළ යුතු බැවින් වාර විභාග පැවැත්වීමකින් තොරව සිසුන් ඊළඟ ශ්‍රේණියට සිසුන් උසස් කිරීමටද එහිදී තීරණය කර ඇත.

කෙසේ නමුත් 11 ශ්‍රේණියේ සිසුන්ට සාමාන්‍ය පෙළ විභාගයට පෙනී සිටීමට පෙරහුරුවක් වශයෙන් එම ශ්‍රේණියට පමණක් ජනවාරි මස දී පෙරහුරු විභාගයක් පැවැත්වීමටත් නියමිතය.

2025 වර්ෂය සඳහා තෙවන වාර විභාගය අවලංගු කර ඇති බැවින් එම සිසුන්ගේ සාධන මට්ටම ඇගයීම සඳහා පන්ති මට්ටමින් ඇගයීම් වැඩසටහනක් ක්‍රියාත්මක කළ හැකි බවත් අධ්‍යාපන අමාත්‍යාංශය සඳහන් කර තිබේ.