පවතින අයහපත් කාලගුණ තත්ත්වය හේතුවෙන් සේවාවන් ගණනාවක් වහාම ක්රියාත්මක වන පරිදි අත්යාවශ්ය සේවා බවට ප්රකාශයට පත් කර අති විශේෂ ගැසට් නිවේදනයක් නිකුත් කර තිබේ.
මෙම ගැසට් නිවේදනය ජනාධිපති අනුර කුමාර දිසානායක විසින් 1979 අංක 61 දරන අත්යාවශ්ය මහජන සේවා පනතේ ප්රතිපාදන අනුව නිකුත් කර ඇති ඇති බව සඳහන්ය.
මෙම නිවේදනය 2025 අද (28) දින අංක 2464/29 දරන අති විශේෂ ගැසට් පත්රය මඟින් ප්රකාශයට පත් කර තිබේ.
ගැසට් නිවේදනයට අනුව විදුලි බලය සැපයීම සම්බන්ධ සියලු සේවාවන්, ඉන්ධන ඛනිජ තෙල් නිෂ්පාදන, ගෑස් ඇතුළුව සැපයීම හෝ බෙදාහැරීම අත්යාවශ්ය සේවා ලෙස ප්රකාශයට පත් කර ඇත.
රෝහල්, සාත්තු නිවාස, බෙහෙත් ශාලා සහ වෙනත් සමාන ආයතනවල රෝගීන් නඩත්තු කිරීම, පිළිගැනීම, රැකවරණය, පෝෂණය කිරීම සහ ප්රතිකාර කිරීම සම්බන්ධ සියලු සේවා මේ යටතට අයත් බව ගැසට් නිවේදනයේ සඳහන්ය.
ගිලන් රථ සේවාවන්, මගීන් හෝ බඩු ප්රවාහනය සඳහා වූ පොදු ගමනාගමන සේවා, ජලය සැපයීම සහ ජලාපවහනය සම්බන්ධ සියලු සේවාවන් ද මේ යටතට අයත් වේ.
ආහාර හා අත්යවශ්ය ද්රව්ය සැපයීම, ආරක්ෂා කිරීම සහ බෙදාහැරීම සම්බන්ධ සියලු සේවාවන් සහ සියලුම දිස්ත්රික් ලේකම් කාර්යාල, ප්රාදේශීය ලේකම් කාර්යාල සහ අදාළ ක්ෂේත්ර මට්ටමේ නිලධාරීන් විසින් ඉටු කළ යුතු සියලුම සේවාවන් අදාළ ගැසට් නිවේදනය මඟින් ප්රකාශයට පත්කර තිබේ.
ශ්රී ලංකා මහ බැංකුව ඇතුළුව සියලුම රාජ්ය බැංකු හා රක්ෂණ සේවා කටයුතු, පළාත් පාලන ආයතන මඟින් කරගෙන යනු ලබන ජලය සැපයීම, විදුලි බලය, කසළ කාණු ක්රමය, ගිනිනිවීමේ හා ගිලන් රථ සේවය, කසල ශෝධනය සහ කුණු ඉවත්කිරීම ඇතුළු සියලුම සේවාවන් ඒ යටතට අයත් බව නිවේදනයේ සඳහන්ය.
